tlhIngan-Hol Archive: Tue Dec 14 08:04:15 2010
[Date Prev][Date Next][Thread Prev][Thread Next]
ram nI' lop bom
- From: "ghunchu'wI' 'utlh" <[email protected]>
- Subject: ram nI' lop bom
- Date: Tue, 14 Dec 2010 11:01:12 -0500
[tlhIngan Hol jatlhwI'pu' QInvam vIngeH. vImughpa' tuvnIS yajbe'wI'pu'.]
toH, <<ram nI' lop bom>> vIleghta'. vIDelmeH wa' mu' vIwIvnIS, ngeD
wIvwIj: chong!
buy' 'ISjaHwIj. Chicago much vIleghmeH wa' jaj neH tu'lu'. vaj wej
Hogh ret chaw'mey vIje'. loQ maghIQ 'e' wInab. loS rep leng 'oH.
qaStaHvIS wa' jaj cha'logh lengvetlh vISUQ vIneHbe'mo', mebpa'Daq
maQong 'e' vInab. 'ej latlh Qu' wISuq: chIrghmajvaD See's Candies
yuch le' wIje'nIS.
vaj chen jeymaj. Saturday be'nalwI' loDnI' juHDaq be'nalwI' SoS
wIHIjmeH Indianapolis wIghoS. pa'vo' Chicago botlh wIghoS 'ej much
wIbej. ghIq Lombard mebpa'mey Hop DIghoS (wa' rep poQ leng). Sunday
maQongpu'DI' 'ej nIQ wISoppu'DI' Downer's Grove-Daq yuch Suy' wISuch.
qaStaHvIS pov juHDaq malengqa', rInpa' pem SoS wISuqqa', 'ej Dor
lengmaj.
Qap nab bID wa'DIch. Qapchu'. 'uQ wISopmeH mayev. pup leng poH.
malengtaHvIS SISqu', 'ach muchmeH vaSDaq mapawDI', SIS 'e' mev.
mapaSbe' 'ej tlhoy ma'eqbe'. nom ngevwI'vo' chaw'mey vIDIlta'bogh
wIHev. tugh lojmIt poSmoHlu' 'ej quSmeymaj wISam 'ej maba' 'ej
maloSchoH. rav'eqDaq Hov leng QoQ wIQoylaH. <Qoy qeylIS puqloD> bom
Qoylu'DI' vIbom je jIH. latlh bejwI'pu' vItu'choH. DIvI' HIp wov tuQ
wa' puq 'ej pu'HIch ngeb qeng; HIp Doq tuQ vavHeyDaj. buy'choH muchmeH
pa'. puS quSmey chIm. wej quS Dan qorDu'wIj; maH retlhDaq chIm cha'
quS. pay' mumerqu' wanI' vIpIHpu'be'bogh: 'el HoD Qanqor, pagh je!
chaH vIrI' 'ej maHagh. ghIq quSmeychaj DItu': quSmaj retlhDaq bIH.
wanI' wInabchu'ta' 'e' rurbej.
mongDechwIjDaq tlhIngan Hol yejHaD DeghHom vItuQ. yotna' wa'DIch
yIvbeH tuQ pagh. HIp Quch je tuQ Qanqor, vaj ghaH buS HochHom.
taghpa' much, SoQHom jatlh much DevwI'. muchmeH ghom QIj; ngoq QIj.
QumwI'mey luchu'Ha'lu' 'e' qap. Dung jIH 'ang, nuja'taH <naDev
mughlu'>. 'ej jatlh <DaH mughwI' poQbe' wa' bejwI'>, Qanqor SIqtaHvIS.
SIbI' pe'vIl majang: <wej! wej maH!> 'ej wej nItlhDu' DI'ang. yajba'
DevwI' 'ej bejwI'pu'vaD lugh'eghmeH jatlh <wej. mughwI' poQbe' wej'e'.
qaSpa' ramvam qaSpu'be'.>
much vIDelQo'. chong. wa'logh mu' mughlu'be', 'ej maHaghqu' jIH pagh
Qanqor je neH.
rInDI' much, majaw DawI'pu' bejwI'pu' je. DIHoy'. mabomqa'. Doj wa'
DawI'; <Qoy qeylIS puqloD> ghojchu'ta' 'ej tlhoS pup ghoghDaj.
maja'chuq much DevwI', qorDu'wIj je.
'eH, Qapchu' nabmaj bID wa'DIch Saja'pu'. pup nab botlh. 'ach nab bID
cha'DIch'e' loQ vIDelvIp. muchmeH yaS wImejrupDI', peDtaH. Do' qachDaq
Duj vIverghmo' QaD. mebpa'mey DIghoStaHvIS, peD net ghur. yav pIDchoH
chuch. QIt jIchIjnIS. mebpa'mey vIleghlaHDI' jIleSchoH, 'ach
jIDughHa'be'mo' maDo'. Duj vImevbeHmoHDI', mevbe'. tlhoS He
wIghoSHa'. 'ach qaSbe' lot 'ej mebpa'maj wIDoQ. "popcorn" vut
be'nalwI'. qul vIchenmoH. qaStaHvIS cha' rep maleS 'ej matuj.
Sunday mavem. nIQ wISop. peD 'e' mev. yuch Suy wIghoS 'ej yuch law'
DIje'. juH wIghoSchoH. malengDI', nurI' be'nalwI' loDnI'. <ghorgh
Suchegh? tlhIHvaD SoS wItatlh wIneHqu'.> wej vI' vagh rep maq chIjmeH
jan. muD Dotlhmo' loS vI' vagh rep vIloy.
jIloyHa'. He'a' wIghoSDI', peDqu'qa'. qaStaHvIS cha' rep tlhoS rav
vIleghlaHbe'. QIt jIghoSnIS. qaS loS rep. Dor pem. qaStaHvIS cha'
latlh jIchIjnIS. Qatlh leng. 'ach rInDI', QaQ Hoch. juHDaq matay'qa'.
maleS. jIQongchu'.
<ram nI' lop bom> much Dabej DaneH'a'? ratlh muchmey puSqu'.
Thursday SaH Marc Okrand. DuHchugh 'eb yIjon! yItIv je!
-- ghunchu'wI'