tlhIngan-Hol Archive: Mon Aug 31 13:41:23 1998
[Date Prev][Date Next][Thread Prev][Thread Next]
meQlaH je bortaS
- From: [email protected] (Alan Anderson)
- Subject: meQlaH je bortaS
- Date: Mon, 31 Aug 98 14:40:15 EST
qechmey puS vIQIjnIS 'e' vIpIH. mu'ghomHom vImuch:
meQmeH por: pormey qatlu'meH nav lo'lu', 'ej tlhIch tlhuHlu'meH, meQlu'.
pIj Hurgh lang rur pormey qatlu'pu'bogh.
machqu'chugh, motlh chIS nav 'ej meQmeH porHom ponglu'.
machqu'be'chugh, motlh Hurgh nav.
Hurghbogh meQmeH por machbe' qel lutvam.
lot DIlwI': lot DIlwI'vaD Huch puS nob nuv.
ghaytan qaSbe' lot 'e' noHchugh lot DIlwI', roD qutlh.
ghaytan qaS lot 'e' noHchugh lot DIlwI', roD wagh.
qaSchugh lot, SIQwI'vaD Huch law' nob lot DIlwI'.
cha'maH loS meQmeH por je' loD. qub meQmeH pormey 'ej waghqu'.
vaj lot DIlwI' rI'. Huq. meQmeH pormey luQaw'lu'chugh qoj
luchIllu'chugh, loDvaD Huch nob lot DIlwI' malja' 'e' lay'.
lotmey Delchu' mabHey: lot 'oH qul'e'.
tugh Hoch meQmeH pormey Dun natlhta' loD. wej lot DIlwI' malja'vaD
Huch nobpu', 'ach lojmo' meQmeH pormey, malja'vo' Huch poQ.
qulHommey law'mo' ngabpu' meQmeH pormey 'e' maq loD. DIlQo' malja'.
motlhba' ghu' 'e' qap. bo'DIjDaq, Qap...loD'e'!
QIj 'oDwI'. qaSchugh qul DIl malja' 'e' lay'bej. qul Hat ngu'ta'be'
vaj loDvaD Huch nobnIS. waghbogh poH nI' SIQbe'meH malja', ghu' laj
'ej loDvaD wa'netlh vaghSaD DeQ nob, qulmeyDaq meQmeH por chIlta'mo'.
nuqDaq 'oHtaH ruv'e' jay' bIghel'a'? petuv, tlhaQchoH lut...
Huch HevDI' loD, ghaHvaD qopmoH lot DIlwI'. loD pum: cha'maH loSlogh
chIch Doch qub 'ej lo'laH meQta' 'e' maq. bo'DIjDaq, luj loD.
qaStaHvIS cha'maH loS DIS bIghHa'Daq loD weghlu'.
bortaS tuj jablu'DI' rut QaQqu' nay'. :-)
-- ghunchu'wI'