tlhIngan-Hol Archive: Wed Jul 29 14:44:01 1998
[Date Prev][Date Next][Thread Prev][Thread Next]
qep'a' QonoSHom
- From: [email protected] (Alan Anderson)
- Subject: qep'a' QonoSHom
- Date: Wed, 29 Jul 98 16:12:01 EST
[I invite eager students to post translations of this message.]
Hoch vIlIjpa' 'op wanI' vIDel vIneH.
mabomchu'ta'! SeymoH <taHjaj wo'>. Qanqor bom chu' vItIv je --
bavchuqlaw' QoQ tlheghmey. 'ej not <DaHjaj po> lIjlu' 'e' vItul.
loQ qetlh 'uQ wa'DIch Soj, 'ach Dajbej juppu'. mutlhej be'nalwI',
puqloDwI', puqloDwI' jup je. maSoptaHvIS, muyu' puq: "How do you say
'Good eating tonight' in Klingon?" vIjangmeH burghwIjvo' SIp chuS
vItlhuD. Haghchu' chaH. DaH qIDwIj vIpay -- reH *burp* chaH jay'.
Dunqa' <pegh mu'>. Qujvetlh vIbej 'e' vItIv. rut tlhaQbej mu'mey.
<nIbpoH> 'oH wa' mu''e'. DelmeH, jatlhlu' <qaSqa'law'>. yajbe' qoch.
SIbI' jatlh ghol <qaSqa'law'>. tlhoS ravDaq vIpum jIHaghqu'mo'.
SIbDoH wov wIbej 'e' wInID. nIS 'engmey. wInIDqa'DI' maQap 'ej
quvwIj vItoDlaw'.
DISvam maH puS HoS wa'ben maH puS puj. chaq mapuS, 'ach mapo'bej!
jIyay'. motlh mayajchuqlaHmeH ngeD. pIj maba' 'ej majaw neH.
wanI'vammo' jIQuchqu'. roD jIja'nISchugh tlhIngan Hol vIlo'.
chongbej Holmaj!
Qov jech pov Daleghta'be' bIDo'Ha'. tlhIngan SuvwI' qu' ghaHbej, 'ej
Sut chenmoHwI' po' ghaHlaw' je.
<wa'nem Qo'noSDaq! wa'nem juHqo'Daq!> mu'meyvam vIjatlhtaHvIS jIpaS.
rInchoHtaHvIS qep'a' vIjatlhnISpu'. 'ach mu' paS QaQ law' pagh mu'
QaQ puS, qar'a'?
-- ghunchu'wI'