tlhIngan-Hol Archive: Wed Jul 15 15:39:19 1998
[Date Prev][Date Next][Thread Prev][Thread Next]
gho'
- From: "Andeen, Eric" <[email protected]>
- Subject: gho'
- Date: Wed, 15 Jul 1998 15:34:41 -0700
vaghHu' ram QoQHey muchwI' ghom vIbej. 'eyqu' QoQ, 'ach motlhbe'chu'.
QoQ janna' chu'Qo' muchwI'. QoQchaj lulIngmeH 'aH Sarqu' lo'. motlh
'aHchaj, 'ach pIjHa' QoQ muchmeH lulo'lu'bej. chorgh muchwI' lutu'lu'.
ghomvaD *Stomp!* ponglu'.
taghDI' much, rav Say'choHmoH wa' muchwI'. ravvo' lam bI'meH, naQHey
lo'. bI'taHvIS chuSba', 'ej rut rav qIpmeH naQDaj lo'. tugh nargh latlh
Say'moHwI'pu'Hey. chuSqu'choH ghom, 'ach QoQ mojlI' chuSlI'ghachvam tugh
'e' lutlhoj bejwI'. narghpu'DI' Hoch muchwI' Say'moHwI' rurbe'bej;
chenpu' QoQ muchwI' ghomna'. veS 'In QoQ rur QoQvam.
'ay' wa'DIch cha'DIch je muchmeH Say'moHmeH naQchaj lo', 'ach latlh
'ay'mey muchmeH Doch pIm lo'. meQmoHwI'Hom lo'. 'un law' lo'. veQ
ngaSwI' lo'. naQna' lo'. qIjbogh mep *pipe*mey tun lo', 'ej Dojqu'
QoQ'e' lulIngbogh. mep 'Inmey lo'. paqHommey lo'.
rut pagh Doch lulo'nIS. pe'vIl rav lugho'. mupchuq ghopchaj. porghchaj
mup ghopchaj.
wa' 'ay' muchmeH, vutpa' Say'meH 'Ib qeng loS loD muchwI'. mongchajDaq
'Ibchaj HuSmoHmeH mIr lo'. 'Ibmey teblu'meH bIQ lo'lu'pu'. 'Ibchaj
chImmoHDI' loDpu', Haghqu' Hoch bejwI', 'ach ghu'na' vIDellaHchu'be'.
leghlu'be'chugh, ghaytan tlhaQbe'.
latlh 'ay' muchmeH, veQ ngaSwI' chImmoH wej muchwI'. Doch Daj tu'DI'
muchwI', woH 'ej lo'choH. Huj Dochmey lo'bogh: mep HIvje' mach, bal
SoQmoHwI', mep HIvje' tIn, nav, poghmey, pe'meH taj jejHa', latlh
Dochmey lo'laHbe' je.
nIn ngaSwI'a'mey qIjDaq Qam wej muchwI', 'ej waq'a' moj ngaSwI'vam.
yItmeH, Qatlhba' Qu', 'ej chuSqu'. yIttaHvIS, waq'a'Heychaj qIptaH
yItwI' naQmey lo'taHvIS. taQqu'ba' ghu'vam, 'ach 'ey.
'ay' Dojqu' muchmeH, qachHey toS HochHom muchwI' 'ej HuSmeH tlheghmey
lo'. mo' poS rur qachHeyvam. 'oHDaq HuStaH Sarbogh Dochmey law'.
Dochmeyvam qIpmeH mupwI'Hom lo muchwI'. muchtaHvIS, 'In ghom'a' moj
qach.
vengraj Suchchugh ghomvam, pejaH. pe'Ij. pebej. lIvuQbej.
pagh