tlhIngan-Hol Archive: Fri Feb 20 12:09:11 1998
[Date Prev][Date Next][Thread Prev][Thread Next]
yaghpu' (yaghmey?)
- From: "Mark E. Shoulson" <[email protected]>
- Subject: yaghpu' (yaghmey?)
- Date: Fri, 20 Feb 1998 15:09:08 -0500 (EST)
De'wI' Quj Daj vIQujchoHpu'. "Creatures" 'oH pongDaj'e'. tlhIngan Hol
vIlo'chugh, chaq 'oHvaD "yaghmey" vIpong. chaq qaq "yaghpu'": loQ Hol
lulo'laH. vIDel 'e' vInID.
yaghpu' QorghnIS QujwI'; ghojmoqHeyDaj moj. "norn" 'oH yaghpu' mut
pong'e'. boghDI' "norn", mach, 'ej pagh Sov. Hol ghojnIS, 'ej ghojmoHlaH
QujwI' latlh "norn" joq. QujDaq De'wI'Hey tu'lu', 'ej Hol ghojmoHlaH je
'oH. napqu' Holchaj; wot puS DIp puS je ghaj, 'ej tlhoS pab Hutlh.
"yInbej *norn*" jIja'chugh, jInepchu'be'. loQ qar. ghojlaH,
'ItlhchoHlaH, valchoHlaH, ropchoHlaH, pIvqa'laH, ghunglaH ('ej SopnIS),
QublaH, HeghlaH ('ej Heghbej), latlhpu' boghmoHlaH 'ej puqvaD "genes"chaj
nob. 'ItlhlaH mut, boghtaHvIS puqpu', puqpu' puqpu' je (*ow, really needed
that comma there*). qo'chaj luDab 'ej luyot 'ej lunuD, 'ej De'Daj lughoj.
DaH vIQIjchu'laHbe'. jIHvaD Doj Qujvam. mut San Sov pagh; luSovbe' Quj
qonwI' je. moQHom lulo'taHvIS reH 'e' tu'law' cha' "norn" 'e' tu' Quj
qonwI'. not mIwvetlh ghunpu': lutu' "norn." chaq leS vIQIjqa'.
SKI: ~mark describes a rather interesting computer "game" he's disovered
lately.
~mark