tlhIngan-Hol Archive: Fri Feb 13 15:25:23 1998
[Date Prev][Date Next][Thread Prev][Thread Next]
latlh De'wI' Quj
- From: "William H. Martin" <[email protected]>
- Subject: latlh De'wI' Quj
- Date: Fri, 13 Feb 1998 18:25:40 -0500 (Eastern Standard Time)
- Priority: NORMAL
ropyaH'a'Daq ratlhmo' SoSwI', be'nI'wI' vISuchlI'. reH vISuchDI'
De'wI'Daj vIDub neH be'nI'wI'. wanI'vamvaD *SparQ* De' polwI'
vIjom. jIQapmo' jIHvaD De'wI' Quj je' be'nI'wI'.
<mol'a' weHwI' cha'> 'oH Qujvam pong'e'. vItaghDI' ngeDqu' Quj.
yItmeH *Lara Croft*, qetmeH, SupmeH, tlhe'meH, toSmeH, bIQDaq
lengmeH, QeqmeH, bachmeH, vay' SuqmeH, vay' lo'meH, vISeHlaH.
cha' vIghro'a' HoH *Lara*. wa' pegh Sam. wej toQ HoH. 'aw'bogh
ghewmey law' HoH. qay'be'. ghaH von nIDba'bogh jan jun 'ej
vaSHomDaq yIt. poS rav. DuQwI''a'mey law'Daq pum. Hegh.
jItaghqa'. vaSHomvamDaq qet *Lara* 'ej DuQwI''a'mey jun. vaS
'elHa'DI' *Lara* nom poSvo' ghoS cha' nagh tIn. *Lara*
lubeQmoHchu'. Hegh.
jItaghqa'. vaSHomDaq qet *Lara* 'ej DuQwI''a'mey jun. naghmey
junmeH nom nIHDaq qet. He'DajDaq ravDaq *Lara* loSba' latlh
DuQwI''a'. junmeH Supchu'. latlh vaSHomDaq pum. nIHvo' *Lara*
ghoS veH. veHDaq *Lara* DuQchu' DuQwI''a'. Hegh.
jItaghqa' 'ej jItaghqa'. ngoQDaj vIleghlaH 'ach reH narghlaHpa'
*Lara* HoH DuQwI''a'mey. wejvatlh rep jImev. jIQap vIneH 'ach
jIDoy'qu'. nargh 'eb.
charghwI'