tlhIngan-Hol Archive: Tue Dec 29 07:52:57 1998
[Date Prev][Date Next][Thread Prev][Thread Next]
jIloStaHvIS
- From: "William H. Martin" <[email protected]>
- Subject: jIloStaHvIS
- Date: Tue, 29 Dec 1998 10:52:55 -0500 (Eastern Standard Time)
- Priority: NORMAL
jIvemtaHmeH jIloStaHvIS Qujvam vIDellI'. nuHmeywIj vIDel.
Quj vItaghDI' pagh nuH vIghaj. 'och machqu' vISam 'ej vIvegh 'ej
'etlh vISammeH He ghoSbogh nagh'e' vIjun. nom 'etlhvam vIlo'meH
mIw vIghoj. yoD vIje'meH tIDaq 'ej balDaq Huch vISam.
vengHomwIjDaq yoD Suy vISam. loSmaH DeQ poQ.
naHlet moy'bI' vISam. ray' Hop vIqIpmeH pov nuHvam 'ach reH
naHlet vISamnIS.
tel le' SIHlu'pu'bogh vIwoDlaH 'ej chegh. lo'laHqu' telvam. ray'
Hop qIplaH telvam 'ej nIch natlhbe'. rut telvam vIQeqlaHbe'
moy'bI' vIlo'nIS, 'ach DoS qIpDI' moy'bI', tev vISIchlaHbe'bogh
chaghchugh jagh vIHoHbogh, jIHvaD tevvam qenglaH telvam.
lo'laHchu'!
Sor Hapvo' chen yoD wa'DIch. lo'laH 'ach meQlaH. naHlet'a'
baH wa' jagh Segh. naHlet'a'vam baHHa' yoDvam. naHlet'a'vam
baHbogh jagh'e' qIp naHlet'a'vam. 'ach yoDvam Qaw'laH latlh.
baSvo' chen yoDwIj cha'DIch.
jInenchoHDI' yoDwIj wa'DIch vIlo'laHbe'. 'etlh chu' vIpoQ je.
moy'bI' tel je vIlo'laHbe' je. Huj nuH vIbaj. Qatlh vIDelmeH Qu'.
QeqmeH 'uD Doq lo'. 'uchwI''e' rarbogh tlhegh baH. vay' tIS
qIpDI' nuHvam, nom jIHvaD DoSvam qeng nuHvam. vIHQo'bogh vay'
'ugh qIpDI' nuHvam, nom DoSDaq muqeng nuHvam. mumerqu' wanI'vam
wa'DIch. jIQeqDI' jIyepqu'nIS. jagh vIqIpbe'chugh SIbI' jaghvam
retlh vIghoS. Do'Ha'.
jorwI'mey vIboS je. loS lup togh 'ej jor. lojmItHey poSmoHlaH.
vIlan 'ej jIqet pagh vIwoD. Qatlh DoS vIqIpmeH Qu'.
tlhe'Qo'bogh He ghoS latlh jorwI' Segh. nom ghoSqu'. lo'laH 'ach
wagh. pegh Suyvo' nuHvam vIje'.
Daj'a'?
charghwI'