tlhIngan-Hol Archive: Thu Oct 10 12:30:58 1996
[Date Prev][Date Next][Thread Prev][Thread Next]
tlhoraQ puqloDpu' lut, 'ay' Soch
- From: Terry Donnelly <[email protected]>
- Subject: tlhoraQ puqloDpu' lut, 'ay' Soch
- Date: Thu, 10 Oct 1996 14:30:46 -0500 (CDT)
(pongmey: tlhoraQ, qaDan, QI'merogh, moraQ, toraQ)
qaDanvo' ghoS QI'merogh. "pIvlob jav," DeghwI'vaD ra' moraQ.
meHDaq ba'taH ghaH toraQ je. yonqu' chaH.
"toH, loDnI'," jatlh toraQ, "maQapchu'. 'otlh bIr rIHwI' wIje'ta',
'ej Huch law' lupoQbe' qaDanganpu'."
" 'ej pagh DaHoHta'," chel moraQ.
"Do'Ha'. loDnI', Ha'. rIHwI'maj chu' vIlegh vIneH." Duj tep mIchDaq
rIHwI' poltaH ngaSwI'. wej 'oH lunuD moraQ toraQ je.
"Su'. vIneH je," jang moraQ. meHvo' tlheD chaH 'ej tep mIchDaq jaH.
tep mIch botlhDaq ngaSwI' tu'lu'. wa' beqvaD ra' moraQ: "yIpoSmoH." tugh
tevchaj lulegh.
'ach pay' rav luteb moQmey mach. pob law' lughaj moQmey. jach vay':
"yIHmey!" vItbej ghaH. ngaSwI'vo' pum SanID - ghobe' - netlh yInbogh
yIHmey! jachchoH bIH 'ej tlhInganpu' DoHchoH. vIHchoHlaHpa' beq, nom
yIntagh yIbmeyDaq Haw'pu' Hoch yIHmey 'ej ngabchu'pu'.
yay'qu' moraQ toraQ je. tojchu' qaDanganpu'. DaH Qo'noSDaq
cheghlaHbe'bej QI'merogh. juHqo'Daq bav yIHmey qengtaHbogh Duj'e' 'e'
chaw'lu'be'. qaSba' jarmey (chaq DISmey), yIHmey jon 'e' nIDtaHvIS beq.
chaq not Hoch yIHmey jonlaH...
toraQvaD jatlh moraQ: "maHvaD wanI' tlhaQ nIvqu' lu'anglaw'ta'
qaDanganpu' jay'."
jang toraQ, "jIHagh vIneHbe'."
pItlh
(toH, rInchu' lutwIj. mu'mey lut, pab lut, wanI'mey lut joq buStaHvIS,
jIHvaD qechmey lab neH'a' vay'?)
-- ter'eS