tlhIngan-Hol Archive: Tue Oct 08 20:53:33 1996
[Date Prev][Date Next][Thread Prev][Thread Next]
Qu'vatlh!!!
DaHjaj juHwIjvo' jItlheDDI' 'IH muD. loQ bIr, 'ach ngoDvam vIparHa'. reH
jIvumchoHpa', jIpawmeH, "bicycle"wIj vIlIghnIS. ("automobile" vIje'be'pu'.
wa' vIDIllaHbe' 'ej vIneHbe'.) qaStaHvIS cha'maH tup, jIlIgh. 'ej 'IHmo'
muD, jIlIgh 'e' vItIv.
jIvumtaHvIS, SISchoH muD. SISqu'choH. 'ej jIvumpu'DI', juHDaq jIjaHnIS.
jatlh *Jenn*, re'wI', "bicycle"wIj leghDI': <va, juHlIjDaq bIjaHbe'qu'
"bicycle"lIj DalIghtaHvIS!>
jImon 'ej jIjang, <HIja'. qay'be'.>
chup Jenn, <juHlIjDaq qaqem jIH.>
jItlhob, <jIH "bicycle"wIj je?>
QuchHa'choH Jenn, 'ej jang, <ghobe'. tInqu' "bicycle"lIj.>
jIjatlh, <vaj jIlajlaHbe'. wa'leS DaqvamDaq "bicycle"wIj vIlIghnIS je 'ej
DaqemlaHbe'chugh vaj DaH jIlIghnIS. qatlho'neS.>
jatlh *Frank*, Jenn "loDnalHom" (see, this is where I'd need the word
'fiancee.'), <toH! HemeyDaq bIQtIqHommey tu'lu' jay'! yIyep!>
vaj SISqu'taHvIS muD, jIlIgh. 'ej loQ Qatlh Qu'. "bicycle" vIlIghtaHvIS,
jIpo', vaj qay'be'. 'ach jIyIQqu'choHchu'! 'ej DubwIjDaq yIQqu'choHchu' je
tlhIngan Hol mu'ghomwIj "Dungeon magazine" je qengtaHbogh ngaSwI'wIj'e'.
mu'ghomwIj Qaw'be' bIQ, 'ach DaH yIQtaH 'ej qaSpu' rep law'. Do', tlhIngan
Hol mu'ghomwIj cha'DIch 'oH. qep'a' wejDIchDaq mu'ghomwIj wa'DIchDaq
ghItlhpu' Okrand, 'ej juHwIjDaq mu'ghomvam tu'lu'. Dat mu'ghom cha'DIch
vIqeng. vaj Qobbe' ghu'.
loQ yIQ mu'ghomwIj 'e' vISaHbe', (qutlh bIH) 'ach "Dungeon magazine"wIj
vIQIHpu'. ghuy'cha'!
chaq muD Dotlh ja'bogh ghot'e' vIQoychoH . . .
SuStel
Stardate 96772.5