tlhIngan-Hol Archive: Fri Feb 18 12:48:19 2011
[Date Prev][Date Next][Thread Prev][Thread Next]
qoqqoqmey - jaj loSmaH wa'
- From: "ghunchu'wI' 'utlh" <[email protected]>
- Subject: qoqqoqmey - jaj loSmaH wa'
- Date: Fri, 18 Feb 2011 15:44:58 -0500
DaHjaj DeS wIloSqa'.
DeS nguSDI' pat chu' 'oghta' qoqpIn.
pat pu'jIn ghItlhta'.
pat 'ay'mey chenchoHmoH ghojwI' puS.
qoq wIHIjmeH, ngaSwI' HoS wIlo'nIS.
ngo' ngaSwI' wIghajbogh.
'ugh.
tlhoy 'ughchugh, maruplu'.
ngaSwI' chu' 'ogh boQwI' val.
tIS 'ej HoS 'ej ghaytan 'IH.
Sup'e' poQbogh ngaSwI' per boQwI'.
malja'vo' Supvam je'ta'.
Do'Ha' paS malja'vam ta'mey.
Sup wIHevbe' qoq wIHIjnISpa'.
ngaSwI' ngo' wIlo'nIStaH.
rIn SeHlaw chu'.
botlhDaq De'wI' mach tu'lu'.
nIHDaq cha' DeghwI' ruQmeH naQ lutu'lu'.
poSDaq wa' ya ruQmeH naQ, chorgh leQmey je lutu'lu'.
ngeDmeH qengwI' Qu', Dopmey ngollaH.
SaStaH De'wI' neH.
Dopmey chong rarmoH ret'aq.
qoq ngo'vo' HaSta noch vIjomHa' rIntaH.
qoq rInHa'Daq vIjom.
qoq ngo' SeHmeH pat laghrup 'ul beq.
patvetlh poQ DISvam qoq cha'DIch.
vaghleS chaq naQHa'taH qoq wIHIjmoH.
qoq nIb wIrInmoHlaH 'ej 'ay' wInge'laH.
'ovmeH che'ron wI'eltaHvIS, jav cheb 'aH le' wIqemlaH.
qaqbe' DuHvam 'ach DuHtaH.
wa'leS Qapbogh DeS vIpIHqu'.
cha'leS jupma'vaD vengmajvaD ngaqmajvaD jIlma'vaD je qoq wI'agh.
wejleS QormeH che'ronDaq latlh ghojwI'ghommey DIqaD.
loSleS qaS qoq tI'meH 'ebmaj Qav.
vaghleS pum 'etlh.
-- ghunchu'wI'