tlhIngan-Hol Archive: Mon Feb 14 13:23:50 2011
[Date Prev][Date Next][Thread Prev][Thread Next]
qoqqoqmey - jaj wejmaH jav
- From: "ghunchu'wI' 'utlh" <[email protected]>
- Subject: qoqqoqmey - jaj wejmaH jav
- Date: Mon, 14 Feb 2011 16:21:32 -0500
DaHjaj vIH qoq DeS.
qaStaHvIS po DeS lISlu'.
reH ghunwI'pu'.
muD vo'wI' qoq wIchu'.
SumwI'pu'Daq SuS bIr wIghoSmoH.
noch wovmoHwI'mey vIDaj.
ngongmeH mIch Qappu'.
maj, che'ronDaq Qap je.
puj 'ach Hoch DoSnaQ megh'an SuDmoH.
megh wISop.
loQ 'up Ha'DIbaH.
meQlaw'pu'.
'ach chong yuch chab.
DeS wIloS.
wIreHqa'.
SeHlaw De'wI'Daq "Chrome" wIjom.
rap chentaHbogh DeS, DeS wIghunbogh je 'e' wI'ol.
wa' choHHom wIngu' 'ej nom choHvam wIta'.
paSchoH rep.
tagha' vIHbeH DeS.
chol Hoch.
qoq SeHlaw je rarmoH ghunbogh ghojwI'pu'.
qoq luchu'.
'ul lunuD.
pe'vIlHa' ruQmeH naQ vIH.
qaS pagh.
nom Seng tu' ghunwI'.
SeHwI' pIm lo'taHvIS SeHlaw, mISchoH.
lumISHa'moH 'ej nIDqa'.
DaH ruQmeH naQ vIHDI', SIbI' nom vIHqu' DeS.
pe'vIl qoq HeH mupqu'.
chuSqu'.
mIr ghor.
yay'bej Hoch.
DeS chavbogh Do tIn law' Do pIHbogh beq tIn puS.
maQub.
manuD.
'ang'egh Seng.
valHa'pu' qoqpIn.
rutlhmey DIngbeHmoH nguSDI'.
nom DIng.
QIt DeS vIHmoHmeH QaplaHbe'.
nuberghmoH Qughvam.
latlh nguSDI' vIwoH 'ej qoqpInvaD vInob.
Qu'vaD puplaw' nguSDI'vam.
lI'Ha' DaHjaj ta'mey.
lI'Ha' wa'Hu' ta'mey.
choHnIS Hoch.
Dor DaHjaj boQ.
jImej.
jIpuQbe' 'ach jIQuchbe'.
ratlh latlhpu'.
chaq tugh QapbeH DeS.
-- ghunchu'wI'