tlhIngan-Hol Archive: Wed Oct 31 15:11:07 2007

Back to archive top level

To this year's listing

[Date Prev][Date Next][Thread Prev][Thread Next]

Hoq QonoS: Tuesday cha'DIch

Alan Anderson ([email protected])

From: Alan Anderson <[email protected]>
Subject: Hoq QonoS: Tuesday cha'DIch
Date: Wed, 31 Oct 2007 18:09:20 -0400

Hoq QonoS: Tuesday cha'DIch

Qav jajvam.  mavem.  mamejrup.  juH wIghIHHa'moH 'ej wISay'moH.   
QongDaq Sut wIteq 'ej 'oH wISay'moH je.  qaStaHvIS wa'maH jaj  
ratlhlI' be'nalwI' loDnI'; wa' Hogh pIq ghaH tlhej parmaqqayDaj.

wa'maH vagh vatlh rep Orlando-vo' ten Duj wIlIghbogh.  pa' nulup  
loDnI' quv.  Hopmo' vengmey, wa'maH wa' vatlh rep Fort Pierce-vo'  
wImejnIS.

wa'maH vatlh rep jIl Such be'nal.  tIjmeH chaw'mey ghItlhmeH, jIl  
De'wI' lo' 'e' nab.  wa'maH vatlh wejmaH rep rI' Duj tI'wI': rIn  
tI'meH Qu' 'ej SIbI' Duj wISuqnISqa'.  SIbI' maghoS jIH loDnI' je.   
nom maghoS.  nom machegh.  nom Duj chu'Daq tep wIlan.  nom Duj  
vergh'a'Daq mamejqa'.  qaSpu'DI' cha' rep vergh'a'Daq mapaw.

DujDaq wa' tep veqengbe'mo' beqvaD vInobnIS.  tIjmeH chaw'mey DIghajmo'
SIbI' ngoqwIj vIchavlaH.  tlheghDaq vIloSnISbe'.

toH, ma'eq.  loQ maghung.  nutlhu'moH Burger King.  wagh Soj 'ach 'ey.
raSDaq maba'taHvIS QonoSvam vIqonchoHmeH De'wI' vIlel.  tugh mumer wab:
Se'De' ("WiFi") tu'pu' pat 'ej naw'taH.  vIDIlnISbe'.

DaHjaj qaS puqloDma' qoS.  ghaHvaD ghItlhHom je' be'nalwI' 'ej QIn qon.
rInDI' ghItlh vItlhap.  Florida-vo' wIngeH wIneH.  vaj ngeHmeH Daq
vInej.  ngeHqangbogh Suy vISam.  Duj wItIj.  qetlh leng.  De'wI' QInmey
laD be'nalwI'.  logh De' "podcasts" vIbuS.

Atlanta-Daq mapaw.  Indianapolis-Daq nuqeng Duj cha'DIch.  DujvetlhDaq
HopbeH quSmeymaj 'e' tu'pu' be'nalwI'.  Duj malja' yaH ghoS 'ej
Hotchuqbogh quS tlhob.  Qapla'!  tay' quSmeymaj chu', 'ej latlh Hotbe'.

qaStaHvIS wa' rep Duj wIlIghbogh wIloS.  pawDI' 'oH leSnIS Duj beq.  beq
qa'meH wIloS.  maloStaHvIS nutlhu' lojmIt vu'wI' 'e' nID.  <quS tun
DaSuqlaH. HIq wInob. tIn 'uSlIj Daq. loSmaH DeQ neH. Ha', yIDIl!>
maruch 'e' tlhoS qap be'nalwI'.  'eb vI'om.  tagha' wItIj.

quSmeymaj DIleghDI' maQuchqu'.  tel chach lojmIt mIchDaq maba'.  tIn
'uSmaj Daq.  leng wItIvbej.  ghIrlI' pem Hov.  ghangwI' 'emDaq So''egh
SaqtaHvIS Duj.  Doqqu' ghangwI'.  SuDqu' ghangwI' Dung.  'IH.

DaH Do'Ha'choH Hoqmaj.  tIqqu'mo' QonoSvam wa'leS Saja'.

-- ghunchu'wI'

Prev by Date: Re: Klingon WOTD: yan (verb)
Next by Date: Add up to 4 inches to yours penis t07e4d
Previous by thread: Re: Klingon WOTD: yan (verb)
Next by thread: Add up to 4 inches to yours penis t07e4d
Index(es):