tlhIngan-Hol Archive: Wed Oct 24 09:55:48 2007

Back to archive top level

To this year's listing

[Date Prev][Date Next][Thread Prev][Thread Next]

Hoq QonoS: Tuesday

Alan Anderson ([email protected]) [KLI Member] [Hol po'wI']

Hoq QonoS: Tuesday

nI'qu'mo' wa'Hu' jIQongchu'.  Hutlogh Qoylu'pu' jIvem.  jISay'eghmoH  
'ej jItuQ'eghmoH.  Do'Ha' noSvagh vIlIjpu' 'ej tujqu' muD.  ghu'  
vISIQrup.

maHvaD nIQ vut jup DISuchtaHbogh.  majaw.  puvbeHbogh loghDuj Dotlh  
wIjIH.  muD Dotlh wIjIH.  QaQlaw' Hoch.  bIQSIp 'ochmey bIrDaq vIHpu'  
chuch 'ej chaq qay'choH.  nuDqu' beq.  qay'be' net wuq.

bIQtIq HeH wIghoS 'ej yavDaq maba'.  chan ghangwI'Daq qach tInqu'  
wIleghlaH.  qach 'ev chanDaq "Pad 39B" wIleghlaH.  loQ bIH joj "Pad  
39A" vIlegh 'ach waQmo' Sormey tIn "Discovery" Duj vIleghlaHbe'.   
wa'maH qelI'qam 'oH chuq'e'.

qaStaHvIS loSmaH vagh tup maba' 'ej maloS.  Se' wIjIHtaHvIS De'  
wIQoylaH.  <jonta'?> <jaH!> <Hung?> <jaH!> <noch?> <jaH!> <Qu' vu'wI'? 
 > <jaH!> <muD Dotlh?> <wej...wej...jaH!> <la'?> <jaH!!>  togh  
tlhaq.  Hut, chorgh, Soch, jav, vagh -- chay'?!  pay' wovqu' ghangwI'  
'ej Sal Discovery.  'eqlaw'.  SIbI' vIt vIyaj: paS neH Se' ghogh  
wIQoytaHbogh.

nom SallI'!  wovqu'!  Doq qul tlhuDtaH Duj.  tlhIch tlhuQ lIngtaH.   
pupqu'.  chungtaHvIS 'eng patlh 'el 'ej nom 'eng DungDaq narghqa'.   
jen 'ej Hop 'ej wov.  qaSpu'DI' chorghmaH lup tagha' wab wIQoychoH.   
loQ chuS wej lup.  ghIq chuS 'e' ghur cha' lup.  ghIq chuSqu' wab'a'  
'ej chuSqu'taH.

nIn Sub jonta' chaghlu' 'e' vIbej.  ghoSqu'taH Duj 'ej DaH qulDaj  
chIS vIlegh.  tagha' Hopmo' Discovery, chal wovDaq qulDaj  
vIleghlaHbe'.  maHu' 'ej jup juHDaq machegh.

maHvaD megh vut.  majaw.  tepmaj wIboS 'ej mamej.  be'nalwI' SoS  
juHHom wIghoS.  Soj SaH wIchov 'ej Soj tetlh wIgher.  maleSpu'DI' Soj  
wIje'.  choS mayIt 'ej nagh ngeng ngeb Hat wInuD.

TV wIbej.  jIl WiFi vIlo' (chaw' wISuqta').  QonoS vIqon.  Dajbej  
DaHjaj.  ghaytan Dalqu' wa'leS.

-- ghunchu'wI'

Back to archive top level