tlhIngan-Hol Archive: Sat Nov 03 08:25:45 2007

Back to archive top level

To this year's listing



[Date Prev][Date Next][Thread Prev][Thread Next]

Hoq QonoS: Qav

Alan Anderson ([email protected]) [KLI Member] [Hol po'wI']



Hoq QonoS: Qav

Sep HopDaq maghIQta'.  SepDaq wIDabbogh macheghta'.  DaH vengmaj  
wIghoSnIS.

muDDuj SaqmeH yotlh wIjaHmeH, yavDujwIj vIruQ.  verghDaH qutlhDaq  
vIverghmoH.  vergh chaw' vISuq.  Hopmo' verghDaH lupwI' vIlIghnIS.   
qaStaHvIS ghIQlI'ghachmaj verghDaHDaq ratlh yavDuj.

SaqDI' Duj wIlIghbogh, mamoD wIneH.  tep mIchDaq tepwIj loSchoH  
be'nalwI' 'ej SIbI' verghDaH vIghoS.  lupwI' vInej.  qutlh verghDaH,  
puS lupwI'.  vIloStaHvIS tepngaSwI'vo' ngaQHa'meH jan vIlel 'ej  
SutwIjDaq vIlan.  ghIq tepngaSwI' vIpoSqa'moH 'ej vergh chaw' vIlel  
je.  tagha' paw wa' 'ej vIten.

verghDaHDaq SIbI' yavDujwIj vISam.  jIcholtaHvIS, Se' SeHlawHom leQ  
vISen 'ej poSchoH DujwIj 'o' lojmIt.  DujDaq tep vIqengtaHvIS vIlan.   
latlh leQ vISen 'ej ngaQHa' DeghwI' lojmIt.  DeghwI' quSDaq vIba'pa',  
rutlh vIlegh.  loQ narghba'pu' SIp 'ej beQchoHpu' rutlh pIrmuS.  Do'  
DujDaq muD ghoSmoHwI' vIqeng.  Duj 'ul lo'mo', jonta' vIchu' vIneH.   
Sutvo' ngaQHa'meH jan vIlel...'e' vInID.  jan vISambe' jay'!

DaH jIwIvnIS.  jIQuchHa''laH pagh jIQuchlaH.  jIQuch 'e' vIwIv.   
taghbej HoQ chu' vIpIHpu'be'bogh!

lupwI' vIloStaHvIS jan vIghajbej.  SutwIjDaq vIlanbej.  'ach ghIq Sut  
rapDaq chaw' vIlanDI', chaq nargh ngaQHa'meH jan 'ej yavDaq pum.   
pagh chaq lupwI'Daq nargh 'ej ravDaq pum.

lupwI' vIlIghpu'bogh vIleghlaw'.  'oHDaq jIqet.  Do'Ha' lupwI' pIm  
'oH.  'ach muQaHqang DeghwI'Daj.  QumwI' lo' 'ej latlh lupwI'  
DeghwI'pu'vaD De'wIj lab.  latlh lupwI'Daq ngaQHa'meH janwIj Samlu'be'.

be'nalwI' vIrI'meH QumwI'wIj'e' vIlo'.  ghu' vIQIj.  lupwI' loSmeH  
Daq vIDel 'ej pa' jan nej ghaH 'e' vItlhob.  HeQ ghaH 'ach  
Quchbe'ba'.  nejtaHvIS ghaH, ghaHDaq jIcheghmeH lupwI' vIlIghqa'.   
matay'taHvIS loSmeH mIch vInuDchu'.  ngaQHa'meH jan tu'lu'be'.

SoSDaj rI' be'nalwI'.  Sengmaj QoyDI' SoS, maHvaD "Saint Anthony"  
qoy' 'e' lay'.  <chIl 'ej Sam> yaHDaq jIqet 'ej jan vIchIlpu'bogh  
vIDel.  QumwI' Quv vInob.  ratlh wa' DuH: HewIj vIghoSqa'.  chaq  
verghDaHDaq jan vIchaghpu'.  vaj lupwI' wIlIgh (vIlIghqa' jIH) 'ej  
verghDaH wIghoS (vIghoSqa' jIH).  HewIj vIqawchu' 'ej retwIj  
vItlha'.  loj pem 'ej loQ Hurgh yav 'ach jIleghlaH.

paghna' vIlegh.  yavDujwIjDaq jIHqa'.  SeHlawHom vIghajtaHmo' lojmIt  
vIngaQHa'laH 'ach jonta' vIchu'laHbe'.  Hoch vIta'pu'bogh vIta'qa'.   
'o' lojmIt vIpoSmoH.  Hoch tep ngaSwI'Daq jan vInej.  DeghwI'  
lojmItDaq jIyIt.  rutlh beQ vIleghqa'.  lojmIt vIHotchoH, 'ach  
chay'!?  Duj HeH bIngDaq, yavDaq jan vIlegh!  jItor.  vIwoH.   
be'nalwI'vaD jan vIjoqmoH.  jonta' vIchu'.  rutlh vIbuy'qa'moH.   juH  
wIghoSchoH.

rIn HoQ wIpIHpu'be'bogh.  taH yIn motlh.  pItlh.

-- ghunchu'wI'





Back to archive top level