tlhIngan-Hol Archive: Tue Jul 31 12:08:48 2007

Back to archive top level

To this year's listing

• Index by Date
• Index by Thread
• Index by Author

taghpa' qep'a' wa'maH loSDIch

Alan Anderson ([email protected])

• From: Alan Anderson <[email protected]>
• Subject: taghpa' qep'a' wa'maH loSDIch
• Date: Tue, 31 Jul 2007 15:06:37 -0400

qaSbej DISvam qep'a' 'e' vISovDI', SIbI' jInabchoH.  tlhejlaHbe'  
be'nalwI', latlh Qu' ghajmo'.  qaStaHvIS qep'a', lut much veng DawI'  
ghom, 'ej muchvaD Da ghaH.  latlh nab ghajlaw' je puqloDwI'.   
<wutlhmo'mey qullungmey je> Quj jupDaj ghom, 'ej qaStaHvIS qep'a'  
Hogh, Hoq'a' lunab.  vaj nIteb qep'a' vIjaH 'e' vIHar.  jISIm 'ej  
jIwuq.  jIlengmeH, chalDuj raQpo' chaw' qutlh law' yavDujwIj nIn  
qutlh puS.  raQpo' chaw' vIje'.  jIyon.

Quchqu'be' be'nalwI', ghaH vIlonlaw'mo', 'ach Sunday pov much  
vIbejmeH jIchegh 'e' vIlay' 'ej QIt nabwIj lajchoH.  yon.

'ach Quchbe'chu' puqloDwI'!  ghaHvaD qep'a' potlh law' Hoq'a'qoq  
potlh puS, pay' 'e' wuq.  nabwIj qeHqu'.  vaj ghaHvaD raQpo' chaw'  
vIje' 'e' vInID.  qep'a' wIghoSmeH Duj rap wIlIghlaH, 'ach buy'mo'  
jIcheghmeH Duj, latlh raQpo' lajQo'.  vaj ghaHvaD Duj malja' pIm  
vISam 'ej chaw' vIje'.  qutlhbe'choH leng.  cha' ghot maHmo', yavDuj  
qutlh law' chalDuj qutlh puS.  'ach macheghmeH yavDuj paS law'  
chalDuj paS qutlh, 'ej much wIbejmeH macheghnISqu'mo', nIv chalDuj.   
mayon.

'ach He pIm wIlengmo', 'ej veng pIm wISuchmo' macheghtaHvIS, maQumlaH  
vIneH.  vaj ghaHvaD QumwI' vISuq.  DaH "cell phone" qenglaH.   
qaSchugh potlh matay'be'taHvIS, maja'chuqlaH.  'ej tugh DuSaQ'a'  
jaHmo', lI'bej QumwI'.  yon Hoch.

Do'Ha' cheghmeH DujwIj qIllu' 'ej Duj paSqu'Daq chaw'wIj Qaylu'.   
ghu'vam vIlajlaHbe'ba'.  Duj malja' vIrI' 'ej DuHmey vInej.   
qIlpu'ghachmo' HuchwIj nobHa'laH malja' 'e' vIghojDI', ruch 'e'  
vIloStaHvIS, latlh malja' Duj chaw' vIje'.  paSchoHmo' jaj wagh 'ach  
DaH Duj rap wIlIgh jIH puqloDwI' je.  vIje'ta'DI' De' Huj munob Duj  
malja' wa'DIch:  jIlengchoHta'pa', Hoch'e' nobHa'laH, 'ach bID  
nobHa'laHbe'.  Philadelphia jIHtaHDI' vIrI'qa'laH 'ej muma'laH.   
jIyonchu'be'.  jIchergh neH.

taHlaH lut, 'ach lutDaq taghpu'mo' qep'a', per pIm vIlo'nIS.

-- ghunchu'wI'

• Prev by Date: Faulty Mailing List Archive?
• Next by Date: Re: Number of Klingon speakers?
• Previous by thread: Re: Faulty Mailing List Archive?
• Next by thread: Gavin Simmons Need S0ftware?
• Index(es):
  • Date
  • Thread
  • Author

Back to archive top level