tlhIngan-Hol Archive: Mon Feb 19 12:18:08 2007
[Date Prev][Date Next][Thread Prev][Thread Next]
paq vIlaDpu'
- From: Doq <[email protected]>
- Subject: paq vIlaDpu'
- Date: Mon, 19 Feb 2007 15:17:34 -0500
- Domainkey-signature: a=rsa-sha1; q=dns; c=nofws; s=dk20050327; d=earthlink.net; b=V7Zp5KTeYN3MGg/63Tkke8nqeCM0U5xnL//nq5FuHWrzvJ1GypqSVjk3l3kPtDO0; h=Received:Mime-Version:Content-Transfer-Encoding:Message-Id:Content-Type:To:From:Subject:Date:X-Mailer:X-ELNK-Trace:X-Originating-IP;
loSmaH ben paq vIlaDpu'. <<'Iw bIrDaq>> ponglu'. qonwI' tuq
jatlhlu'DI' <<qapotIy>> rur. DIvI' Holvo' qonwI' pong mughchugh,
<<loD vIt>> rap. jIHvaD Qatlh pongvetlh jatlhmeH Qu'. <<teru'man>>,
<<ruman>>, <<tuman>> ghap rur.
Qapqu'mo' wIjwI' malja'Daj, puH law' Suqta'. puHvam vu'meH, Du'vumwI'
DIl wIjwI'. ja'chuqtaHvIS wa' Du'vumwI' wIjwI'vam je, wIjwI' Huch
qelchoH. <<qaStaHvIS wa' jar motlh Du'vam vIleHmeH wa'netlh DeQ vIpoQ!
>> jatlh wIjwI'.
Du'vumwI'vaD Huch law'qu' 'oH wa'netlh DeQ'e'. mIpba' wIjwI'vam not
'e' lIj.
latlh veng ghoS Du'vumwI'vam. vay' nIH. bIghHa' ghoS.
bIghHa'Daq latlh nIHwI' qIH. ja'chuq. nIHwI' cha'DIchvaD wIjwI' mIp
Del nIHwI' wa'DIch.
nIHwI' cha'DIch vuQchoH wIjwI'vam Huch. nIH neHbej. tugh bIghHa'vo'
tlhabchoH. nabmey chenmoH. najchoHtaH.
bIghHa'Daq latlh jup ghaj nIHwI'vam. nIHqang je. chaq nab SovchoH
jupvam 'e' Har nIHwI' cha'DIch. tugh bIghHa'vo' tlhabchoH jupvam je.
chaq wIjwI' Huch nIHmeH QaHqang.
cha' 'ay' neH ghaj nab:
wa': Huch nIH.
cha': nIHwI'pu' ngu'laHchugh vay, ngu'wI'pu' HoHnIS nIHwI'pu'.
wa' be'nal loS puqpu' ghaj wIjwI'. nayta' cha' puqbe'pu' 'ej Du'
Dabe'ta'. latlh Sep ghoS. Hop.
Du' Da wIjwI', be'nal, puqbe', puqloD je. paw cha' nIHwI'pu'. Qagh
tu' nIHwI'pu'. Huch Hutlh wIjwI'. puH ghaj, 'ach Huch yejHaDDaq
HochHom HuchDaj pol wIjwI'. Du'Daq loSmaH DeQ neH ghaj.
loSmaH DeQ nIH. wIjwI', be'nalDaj, puqbe'Daj, puqloDDaj je HoH
nIHwI'pu'. ghop qam je bagh 'ej nachDaq baH nISwI' beH. nuchna'
chaHba' HoHwI'.
nargh, ghIq jonlu'. qaStaHvIS vagh DIS wuqlaHta'be'mo' bo'DIj
bIghHa'Daq ratlh chotwI'pu'. ghIq chotwI'pu' HoHmeH mong bagh.
mongDu', rav'eq je rar cha' tlhegh. cha' lojmIt le' ghaj rav. poSDI'
lojmItmeyvam, pum chotwI'pu'. rav veb ghoSlaHpa' chotwI' qamDu', mong
mevmoH tlhegh.
chaq ghor mong 'ej nom Hegh chotwI'. chaq ghorbe' mong 'ej
tlhuHlaHbe', QIt Hegh chotwI'. SaHbe' noHwI'.
Doq