tlhIngan-Hol Archive: Wed Aug 08 19:24:39 2007
[Date Prev][Date Next][Thread Prev][Thread Next]
jIb'e' 'untuq, nagh le'qu' je -- nav wa'DIch
- From: Doq <[email protected]>
- Subject: jIb'e' 'untuq, nagh le'qu' je -- nav wa'DIch
- Date: Wed, 8 Aug 2007 22:22:59 -0400
wa' lut'a'vaD tlha'chuqmo' Soch paq, paqtlhegh vIpong. rInta'
paqtlheghvam, vaj jImughchoH vIneH. Qatlh. mu'mey law' vIHutlh, vaj
jImoSnIS. paq qonwI' chaw' vIHutlh, vaj DIvI' Hol vI'angQo'. botIv
'e' vItul.
jItagh:
paq wa', 'ay' wa':
yIntaHbogh loDHom
naHveH HeDaq juH loSDaq Dab Derghll' tuq. <<mataQHa'bej!>> pa'
jatlhlaHmo' loDnal be'nal je, Hem. Hujlaw'ghach lucherghmo'Qo'
HujchoH nuvpu'vam not net pIH.
malja'vaD vum loDnal. Hap Subbogh veghmeH tlhe'bogh baS naQHommey
chenmoH malja'vam. ghanIngSe' 'oH malja'vam pong'e'. pa' pInHom ghaH
loDnal'e'. tIn ghaH. pI' 'ej Somraw ghaj. mong Hutlhlaw'. loch tInqu'
ghaj.
lang be'nal. SuD jIbDaj; pemHov rur. tIqqu' mong; cha' mong rur.
jIlpu'Daj ghoqmeH lI'qu' mongvam. Hur tlhoy' Dung juSlaH mongvam.
puqloD ghaj nuvpu'vam. DaDlI' 'oH pongDaj'e'. DaDlI' QaQ law' Hoch
loDHom QaQ puS 'e' 'oH vuDchaj'e'.
Hoch'e' luneHbogh DerghlI' tuq lughaj DerghlI' tuq, 'ach wa' pegh
ghaj je. peghvam tu'chugh vay', vaj ghu'vam Hajchu' tuqvam. ghu'vam
'up law' Hoch 'up puS.
[rIn nav wa'.]
-- Doq