tlhIngan-Hol Archive: Tue May 27 19:51:15 2003
[Date Prev][Date Next][Thread Prev][Thread Next]
puvlaH SajwIj
- From: Eric Andeen <[email protected]>
- Subject: puvlaH SajwIj
- Date: Tue, 27 May 2003 17:45:09 -0700
bo'Degh wIghaj jIH, be'nalwI' je. Sajmaj 'oH, 'ej ZaZu wIpong. QuptaHvIS
ZaZu, telDu'Daj boDu' DIpoDmoHtaH. puvlaHbe'. puv 'e' nIDDI', telDu'Daj
laqmoH, 'ej pum 'e' SeHlaH, 'ach qajlaHbe'. ngunbejtaHvIS pIj telDu'Daj
laqmoHtaH, 'ach pIjHa' puvchoH. chaq reH; chaq mI'. maSovbe'. laqmoHtaHvIS
Quchlaw'. puv tlhoS not chIch 'e' nID. roD pumDI' neH, qoj ghIjlu'DI', puv
'e' nID. puv 'e' wItuch 'e' Sovlaw'. chIch puvDI' loQ wIqun.
'ach wa' ben telDu'Daj boDu' DIpoDmoH 'e' wImev. chentaHvIS telDu'Daj boDu'
chu', QIt laqmoHmeH laHDaj Dub ZaZu, 'ej puvlaH QIt 'e' tlhojchoH. DaH
puvlaHqu'bej. Hoch ram, QongDaqDaq maQong jIH, be'nalwI' je, 'ej QongDaq
pa'Daq Qong je ZaZu. 'ej HochHom po, QongDaq pa'vo' bach'egh (nom ghoS; peng
rur) 'ej mo'DajDaq ngun. wa' wen, rut puvHa', 'ej ravDaq Saq. cha'logh
puchpa' Say'moHmeH DaqDaq Saq. 'ach DaH not puvHa'. reH mo'DajDaq ngun.
QaQ'a' ghu'vam? jISovbejbe'. roD puv net tuch 'e' Sovlaw'taH. QongDaq
pa'vo', mo'DajDaq puvqangbej, 'ach HochHom latlh DaqDaq puvqangbe'. juHDaq
maHbe'taHvIS jIH, be'nalwI' joq, mo'Daj qoDDaq 'oHtaH ZaZu, vaj
SenglaHbe'law'. HurDaq malengchugh nutlhejtaHvIS ZaZu mayepnISqu', 'ach
qay'be'. lengmeH mo'Hom wIghaj, 'ej 'oHDaq ZaZu wIpoltaH. vaj Qobqu'be'
puvmeH laHDaj, 'ej qabbe'law' ghu' 'e' vInoH.
pagh