tlhIngan-Hol Archive: Tue Oct 29 23:48:25 2002
[Date Prev][Date Next][Thread Prev][Thread Next]
cha' qo'mey pIm 'ay' cha' (ngo')
- From: [email protected]
- Subject: cha' qo'mey pIm 'ay' cha' (ngo')
- Date: Wed, 30 Oct 2002 00:49:17 EST
Here is the proofed reprint of Chapter Two of Leo P. Kelley's "Worlds Apart"
lIy'a' Qob
Duj raQ leQ ‘ej mej ‘e' bej qara. ‘IQ. nom mej leQ. qaravo' nom
mejlaHchugh leQ, vaj nom mejlaw'. tugh Dujvetlh leghbe'choH qara. ghIq
tlhe''eghmoH ‘ej yaHDaj ‘el.
yaH qoDDaq jatlhtaH ghotpu' ‘ej vIHtaH. DaH SaHtaHbogh yaSpu' law' law',
poH pIm qawlaHbogh qara SaHtaHbogh yaSpu' law' puS. yIt qara ‘ej qochDaj
nej. yIttaHvIS qara, ja'chuq yaSpu', ‘ej lIy luqel mu'meychaj.
jatlh wa' yaS, <<qIbvam luveghbogh lIymey lIyvam tIn law' Hoch tIn puS ‘
e' vIQoy.>>
ghel yaS pIm, jatlh, <<numupchugh chay'....?>>
jang wa'DIch, jatlh, <<qaSchugh, qay' jay'.>>
yIttaH qara. ghaH luDech mu'mey chuS.
jatlhlu', <<Hemey qev ghotpu'... chaH DISeHnISlI'...>>
yaSpu' ghom juS qara.
jatlh wa', <<nuqneH, qara!>> qara vanta' ghaH.
jatlh qara, <<Se'tIv Sogh! qochwI' bI'raQ Daleghpu''a'?>>
jatlh Se'tIv, <<bI'raQ? HIja'. tupmey ret vIlegh. ‘em pa'Daq ghaHlaw'.>
>
‘em pa' ghoSchoH qara. pawDI', lughbej ghaHvaD jatlhpu'bogh yaSvetlh'e'.
‘em pa'Daq ghaHtaH bI'raQ'e' ‘ej De'wI' HaSta lIy qelbogh jabbI'ID Qav
laDlI' ghaH.
jatlh qara, <<bI'raQ!>>
tlhe''eghmoH novvam. run ghaH, qara qIvon SIch neH yorDaj. ‘ach nom
vIHlaH, SuS rur. ‘ej HoSchu' loS DeSDu'Daj, baS rur. teSDu' Hutlh. wabmey
QoylaHmo' DIrDaj, lI'be' teSDu'. qara leghchoHDI', wa' DeSDaj joqmoH. ‘ej
bochqu' mInDu'Daj Doq.
qaravaD ja', <<qaleghmo' jIQuch. Qu''a' wIchavnISlaw'.>>
ghel qara, jatlh, <<lIy qelbogh De' chu' DaQoypu''a'? nuq ‘oH?>>
<<qen lIy tu'DI' vay, ‘o'rIn qIb Sengbe' lIy ‘e' luQub tejpu',>> ja'
bI'raQ. <<'ach ghIq merpu'; He chu' ghoSchoH lIy. Hov jav ghoSchoH.>>
ghel qara, jatlh, <<qatlh ghoSchoH lIy. ghoSchoH ‘e' raD nuq?>>
QIj bIraQ, jatlh, <<lIyvam cholpu' tInbogh lIy pIm. lIy tInDaq lIy mach
chuH lIy tIn. ghIq, meQ rIntaHDI' lIy tIn, He chu' ghoSchoH lIyvam mach.
vaj ghaytan nungeQ.>>
jatlh qara, <<nungeQ? DIch lughaj'a' tejpu'?>>
janglaHpa' bI'raQ, yaHDaq chuSchoH ghum ‘In. ghIq yaSpu'DajvaD ra'meH
la', tlhoy'Daq bIHbogh ghogh baHmeH jan'e' lo'. yaSpu'vaD ja' la', <<veng
Daqmey law'Daq nIHwI'pu' lutu'lu'.>> nIH ‘e' lumevmeH, yaSpu' ngeH pIn.
tamqa'DI', qaravaD jang bI'raQ, jatlh, <<nungeQbej lIy ‘e' luchov tejpu'.
Hovmaj tIn law' lIy tIn puS. mucholtaHchugh lIy, vaj yuqmajDaq lIy ghoSmoH
yuQ tlham.>>
jatlh qara, <<qabqu' Dotlh.>>
bochchoH bI'raQ mInDu' Doq.
ghIq ghel qara, jatlh, <<Hov jav nuqDaq mup lIy? Sov'a' tejpu'?>>
jangmeH bI'raQ, cha' mu'mey neH lo', jatlh, <<naDev pup!>>
ghel qara, jatlh, <<vengmajDaq Saq'a'? qechvam DaHech'a'?>>
jatlh bI'raQ, <<'e' vIja'. vengvo' jaHmeH rewbe'pu', Dujmey ‘orlu'.>>
ghIq chuS ‘In pIm. ‘ej jatlhqa' la'. veng botlh lughoS qara bI'raQ je ‘e'
ra'. Daq Qobbe' lughoSmeH rewbe'pu'vam, yavDungDuj'a'mey tIn yong chaH ‘e'
luQaH qara bI'raQ je ‘e' ra' la'.
veng botlh lupawDI' qara bI'raQ je, pa' wa' yavDungDuj'a' neH lutu'lu'
chaH. wa' neH tu'lu'! ‘ej luyong ‘e' lunID ghotpu' law'qu'.
Harghchuq ghotpu'. yavDungDuj'a' luyong ‘e' lunIDmeH Humanpu' novpu' je,
yuvchuq. yavDaq wa' be' pummoHlu'. Duj yonglI'bogh wa' loD lunge' cha'
novpu'. ghot ghomDaq loDvam luchuH. jachqu' loD. Duj lucholmeH ghomvam
ghotpu', loDvam lugho'.
Dat nuD bI'raQ, ghel, jatlh, <<nuqDaq bIH latlh yavDungDuj'a'mey'e'?>>
jatlh qara, <<Qaghlaw'. Harghchuq ghotpu'vam ‘ej QIHchuq ‘e' wImevnIS.>>
pe'vIl ghom ‘el qara. pe'vIl Humanpu' novpu' je juS ‘ej Duj chol. QIt
tlha' bI'raQ.
jach qara, jatlh, <<'eH, bI'raQ. HIchlIj yIlo'!>>
‘uDHIchDaj pep bI'raQ; muD bach. ‘ach Duj luyongtaH nuvpu' ‘e' lunID ‘
e' lumevbe'bej. qara paw bI'raQ.
jang ‘orwI' be', jatlh, <<'Iq, qaH. tlheD ‘e' vInID. ‘ach yongtaHbogh
ghotpu' vIQIH vIneHbe'.>>
jatlh qara, <<SoH luqevbe' ‘e' wIta'. DaH yItlheD! ghIq latlh
lIghwI'pu' DatlhapmeH tugh yIchegh!>>
ghom luDoHmoHmeH qara bI'raQ je, ‘uDHIchmeychaj lo' ‘ej Duj tlhop yavDaq
baH. muDDaq puvchoH Duj ‘ej ngab.
qaSpu'DI' tuqmey, jach ghom wa' loD, jatlh, <<pelegh!>> chalDaq SIq
ghaH. Dung legh qara. DoqchoHpu' chal.
jatlh bI'raQ, <<cholmo' lIyna'....>>
jach ghom ghotpu' law', jatlh, <<ghoQaH!>>
Haw' ‘op. yavDaq pum HochHom novpu' ‘ej Qotchu' nachDu'chajDaq
ghopDu'chaj lan chaH.
jatlh bI'raQ, <<tujqu'choHtaH. naDev cholbejmo' lIy, qaS Dotlh.>>
qara retlhDaq Qam bI'raQ. DaH lIy leghlaHchu'. qaSchoHpu'DI' wanI',
Hopbogh SechHom Doq rur. ‘ach DaH tInchoHpu'. ‘ej tInchoHtaH.
pa'vo' qara luHmeH bI'raQ, loS ghopDu'Daj lo'. ‘ach jachbej qara ‘ej
chalDaq Sen. Dung bej bI'raQ. Dochvetlh ngu'pu'bogh qara legh je ghaH.
yavDungDuj'a' ‘oH. latlh ghotpu' yongmoHmeH chegh. lIy He jun Duj ‘e'
lubej qara bI'raQ je, ‘ach junlaHbe'. Duj mupbe' lIy, ‘ach Duj meQchoH lIy
tuj'a'. yavDaq SaqHa' Duj. yav choltaH lIy.
qara luHqa' bI'raQ ‘ej jach, jatlh, <<Ha'!>>
DaH veng Dop HopDaq Saqqu' lIy. qaS wab chuSqu'. qaS latlh. pumchoH
qachmey. Dat meQchoH qulmey. meQchoH je Humanpu' novpu' je, ‘ej wanI'
lutu'laH neH qara bI'raQ je. ngugh DejchoH chaH retlhDaq ‘oHtaHbogh wa'
qach'e'.
bI'raQvaD jach qara, jatlh, <<yIyep!>>
qetchoH chaH. ‘ach yapbe' Daqvetlhvo' jaHbogh bI'raQ Do. porghDaj mup
pumbogh qachvetlh ‘ay'Hom. yavDaq bI'raQ pummoH.
bI'raQ pep qara ‘e' nID. ‘ach qara yuv bI'raQ.
jatlh bI'raQ, <<bImejlaHmeH ‘ebvam yIjon! qara, yIruch!>>
‘ach mejqangbe' qara. Dat legh. ghaH luDech Dejbogh qachmey. meQlaw'
je qara ‘e' qaSmoH qulmey tuj'a'. ghIq ghaH retlhDaq loD'e' legh qara.
loDvaD rI'. Daq QanDaq bI'raQ qeng qara' ‘e' boQ loDvam, ghaHvaD ‘e' tlhob.
‘ach tlhe'egh loD ‘ej qetchu'.
loDvaD jach qara, jatlh, <<yImev! yIchegh! HIQaH!>>
mevbe' loD. qettaH. tlha'choH qara. ngugh qaS wanI''a'.
pay' veng HeDaq qetbe' qara! naDev qachmey lutu'lu'be'. ngabpu' loDvetlh
tlha'bogh qara. qet ‘e' baq. Dat legh. naDev ghaHtaHbogh Sovbe'ba'.
vengDajDaq ghaHtaHbe'. Hov jav pagh DaqDaq ghaHbe' ‘e' Sovchu' je!
(tugh bolaDlaHtaH)