tlhIngan-Hol Archive: Tue Oct 29 23:41:52 2002
[Date Prev][Date Next][Thread Prev][Thread Next]
cha' qo'mey pIm 'ay' jav (chu')
- From: [email protected]
- Subject: cha' qo'mey pIm 'ay' jav (chu')
- Date: Wed, 30 Oct 2002 00:42:35 EST
Chapter Six of Leo P. Kelley's "Worlds Apart"
leQ nab
qaravaD ghel bI'raQ, jatlh, <<qatlh DISvam chongDaq nulanta' Depmey? meq
DaSov'a'?>>
jatlh qara, <<vISov. pa' ngaSwI'vetlh tIn Dalegh'a'?>> DIS chong
retlhDaq ‘oHtaHbogh ngaSwI''e' ngu'.
ghel bI'raQ, jatlh, <<nuq ‘oH?>>
jatlh qara, <<Supawpa', ngaSwI'vetlhDaq wa' Ha'DIbaH lulan Depmey.
mujontaHvIS Ha'DIbaHmey jonpu'bogh Depmey wa' Ha'DIbaH ‘oH. ngaSwI'vetlhDaq
luvut!>>
ngaSwI' luleghqa' bI'raQ leQ je.
jatlh qara, <<Soj wIDa ‘e' lunab Depmey.>>
jatlh bI'raQ, <<'e' wIchaw'be'. ruchlaHpa' Depmey, manargh.>>
jatlh qara, <<manarghlaHbe'law'. DISvam chong Dopmey taHqu' toSlaHbe'
vay'. reH pumqa'. ‘ach latlh wanI' vIDel vIneH.>>
ghel leQ, jatlh, <<nuq ‘oH?>>
jatlh qara, <<mIqta' lughaj Depmey. mu'mey vIjtalhbogh yajmeH lo'.
mu'mey jatlhbogh Deppu' vIyajmoH je mIqta'. Hov jav lughoS Deppu' ‘ej vIDor
neHbej chaH.>>
ghel bI'raQ, jatlh, <<qatlh?>>
jatlh qara, <<pa' vIDab, jIja'. pa' ghotpu' law' tu'lu', jIja'. naDev
puSchoHpu' Soj luDabogh Ha'DIbaHmey, ja' Deppu'. vaj ghotpu' SopmeH chaH, ‘
ej qo'maj ghotpu' jonmeH chaH, ‘ej qemmeH chaH, vaj qo'maj lughoS chaH luneH
chaH.>>
jatlh bI'raQ, <<toH. cha' Sengmey DIqaD. wa': DISvam chongvo'
manarghmeH mIw wISamnIS. cha': qo'maj ‘elmeH He luSambe' Deppu' ‘e'
wIraDnIS.>>
jatlh qara, <<qo'maj cheghmeH He vISovbe' jIH.>>
qaravaD jatlh leQ, <<'a wISov. bI'raQ wItlho'bej. rarchuqbogh cha'
qo'mey Daqvetlh ngu'pu' ghaH. Daqvetlh luleghlaH cha' qo'mey nuvpu'.>>
jatlh bI'raQ, <<'ej Hemaj wIghochqa'meH, naghmey vIlo'ta'. leQ jIH je
jonpu'bogh Dapmey Daq'e' wIcheghlaHchugh, nagh tut wIpawmeH nagh He
wIghoSlaH. vaj Hov jav wIcheghlaH.>>
jatlh qara, <<chay' Sengmaj wa'DIch wIjey? chay' DISvam chongvo'
manargh?>>
qaravaD ghel bI'raQ, jatlh, <<wej mIwvam Danabchu'be' ‘e' DaHech'a'?>>
ghaHvaD ghelqa' qara, jatlh, <<nuq DaQub SoH? qech Daghaj'a' SoH?>>
beq QumwI'Daq qew bI'raQ, jatlh, <<napqu'. nuQaHmeH vay', Dochvam yIlo'!>
>
jatlh qara, <<Qapbe' qechvam. QaH vISuqmeH jIrI'pu'. ‘ach qo'maj
rI'laHbe' QumwI'wIj.>>
jatlh bI'raQ, <<'ej HIchwIj vIchIlpu'. nagh tut vIchenmoHtaHvIS
vIchIllaw'.>>
jatlh qara, <<HIchwIj vIghajtaH. mujon ‘e' lunIDchugh Deppu'vetlh,
vIbach ‘e' vInab.>>
jatlh bI'raQ, <<wa' HIch neH... Deppu' law' tu'lu'mo', nuQaHbe' wa'....>>
jatlh leQ, <<wa' HIch ghajbogh vay' ghu' QaQ law' pagh HIch ghajbogh vay'
ghu' QaQ puS.>>
jatlh bI'raQ, <<bIlugh. DaH mawuqnIS: chay' qara HIch wIlo'. QaQ nuq?>>
jatlh qara, <<Hoch Deppu'vam DIHoHlaHchugh, DISvam chongDaq maratlh.
puvlaH Deppu', ‘ach mapuvlaHbe' maH.>>
pay' jach leQ, jatlh, <<Qu'vatlh! telDu'... mIwmaj ‘oHbej je!>>
leghchuq qara bI'raQ je, ghIq leQ qaD.
montaHvIS leQ, jatlh, <<peyay'Qo'! yabwIj vIchIlpu'be'. tel wIghajbe'
maH ‘e' vISov. ‘ach telDu' ghaj Hoch Deppu'vetlh.>>
jatlh qara, <<leQ, nuq Dajatlh? jISovbe'.>>
jatlh bI'raQ, <<jISovbe' je jIH.>>
chaHvaD jatlh leQ, <<jIQIj. DaH nabwIj yIQoy!>>
ghIq qechDaj ‘ang. ‘angpu'DI' leQ, jatlh bI'raQ, <<chaq Qap. maruch!>>
jatlh leQ, <<jIvang.>>
jatlh qara, <<Qo'! leQ! jIvang jIH'e'.>>
pe'vIl qara bej leQ.
leQvaD jatlh qara, <<leQ, latlh van vIbaj vIneHbe'. HIchvam vIlo'laH.
muqeqmoH moch. not HIch Da'uchpu' jay'.>>
jatlh bI'raQ, <<leQ, lugh qara. vang ghaH ‘e' yIchaw'!>>
jatlh leQ, <<maj. SuQapqa'.>>
ngugh loSmeH, ba' wej ghotpu'. DIS chongDaq ghIrpa' telDu' ghajbogh wa'
Dep, leQ nab lutaghlaHbe'. poH nI' loSbe'. DIS chong HeHDaq Qam wa' Dep.
tlhup qara, jatlh, <<toH. mavang. jIQap ‘e' yIbuS!>>
ghIq DIS chong bIS'ubDaq Saq Depvam. Dat qet Ha'DIbaHmey ‘ej SaQ. wa'
Ha'DIbaH ‘uchchoHpa' Dep tIn, bach qara. Heghmo' Qot.
qaSpu'DI' tupmey, DIS chong HeH lupaw telDu' ghajbogh latlh Deppu'. Dep
Hegh lulegh Hoch.
Deppu'vaD jach qara, jatlh, <<mIqta'raj yIqem!>>
puv wa' Dep; ngab. cheghDI', mIqta'vetlh ‘uch.
jatlh qara, <<Depvam vIHoHta'. Dochvam vIlo'.>> ‘uDHIchDaj luleghmeH
Deppu', pep. jatlhqa', <<naDev ghIrchugh vay', vaj vIHoH je.>>
jatlh wa' Dep, <<DIS chongDaq bIHbogh Ha'DIbaHmey DIpoQ. Sojmaj bIH.>>
jatlh qara, <<bIH tItlhap! ‘ach ghotlhapQo'! ‘ej Ha'DIbaHmeyvam
botlhaplaHpa', naDevvo' Supuvmo' cheqengnIS.>> leQ bI'raQ je ngu', jatlhqa',
<<cha' ghotpu'vam bojonbogh Daq'e' ghocheghmoH!>>
ja'chuq Deppu'. ghIq jatlh wa', <<bItlhobmo' mavangrup. DIS chongvo'
reqengmeH mapuv. Daqvetlh boghoS boneHbogh repawmoH.>>
‘uDHIchDaj pepqa' qara, jatlh, <<chetojchugh, vaj SaHoHbej.>>
jatlh Dep, <<mapuvtaHvIS reqengtaHvIS juHoHchugh, vaj Supum ‘ej SuHegh je
tlhIH.>>
jatlh qara, <<vISov. ‘ach naDev maratlhchugh, maHegh. DaH ghopuvmoH!>>
DIS chong ravDaq ghIr telDu' ghajbogh wej Deppu'. qara woH wa'. leQ woH
latlh. bI'raQ woH latlh. ghIq chalDaq Sal Hoch wej Deppu'. Hopqu' bIng
yav. HIchDaj ‘uchchu' qara. tojbe' Deppu' ‘e' tul ghaH. qara leQ bI'raQ
je chagh Deppu' ‘e' luwuqchugh, vaj chay'? qaStaHvIS wa' tup mInDu'Daj
SoQmoH.
pay' jach bI'raQ, jatlh, <<pa' ‘oH! bIngDaq ‘oH!>>
yav lurgh lupuv wej Deppu'. lupawpu'DI', cha' Humanpu' bI'raQ je roQ.
ghIq chalDaq Salqa'.
jatlh qara, <<nuchagh ‘e' vIHaj.>>
jatlh leQ, <<qechvam DabuS ‘e' yImev! nuchaghbe' ‘e' vISovchu'.>>
leQvaD ghel bI'raQ, jatlh, <<chay' bIbej?>>
jang leQ, jatlh, <<qo'maj ‘elmeH He lunej Deppu', jatlh qara. QapmeH,
wa' mIw ngeD law' Hoch ngeD puS. naDev maQantaHvIS mapaw, ghIq qo'maj
wI'elDI' nutlha' Deppu'. Deppu'vaD lI'bej mIwvam.>>
chal legh bI'raQ, jatlh, <<nuqengpu'bogh wej Deppu' tu'lu'taH.>>
jach qara, jatlh, <<peqIm! pawlI' latlhpu'.>>
lugh qara. chal lutebchu' telDu' ghajbogh Deppu'.
jatlh bI'raQ, <<nutlha'be' ‘e' wIraDnIS.>>
jatlh leQ, <<'ach nutlha'bej. ‘e' vISov. qo'maj lu'ellaHbe'meH mIw vaQ
wIchavnIS. va, paghlogh qo'maj wIcheghnISqa' maH'e'. Ha'!>>
nagh He chenmoHta'bogh bI'raQ lughoSchoH wej ghotpu'. rarchuqbogh cha'
qo'mey Daq nagh tut'a' tIn lupaw chaH.
qew bI'raQ ‘ej jatlh, <<mapawpu'. qo'maj ‘elqa'meH He ‘oH.>>
jatlh qara, <<'e' wISov. ‘ej DaH ‘e' luSov je Deppu'.>>