DuSaQ vIrInchu'

["d'Armond Speers" <speersdl@msn.com>]

wa'maH ben DuSaQ'a'Daq HolQeD vIHaDchoH. DISvam mIwvam vIrIn. DaH Holtejna' jIH.
jIrIn 'e' wIlopmeH cha' Hogh ret DuSaQwIj (*Georgetown* DuSaQ) chegh qorDu'wIj. mutlhej be'nalwI', puqloDwI' je. DuSaQDaq nughom latlh law': SoSwI', loDnalDaj je; vavwI', be'nalDaj je; be'nalwI' SoS, vav je. nughom je juppu': *teD*, *jen* je, 'ej puqbe'Daj, *lara*; *jey*, *jevrIy* je. qaStaHvIS poH nI' juppu'na'wI' chaH *teD*'e', *jen*'e', *jey*'e' je. (*jey* parmaqqay ghaH *jevrIy*'e'.) nughom je 'angghal ('ach ropmo' be'nalDaj nughombe' ghaH); *Marc Okrand*; jupDaj, *Richard* je. ghomDI' Hoch, SaH wa'maH Soch nuv.  
tay vItIvbej. patlh nIvqu' vIHevmo', tlhopDaq jIba'. tIn vaS. ghojwI' tlhopDaq ba' ghojmoHpu'wI', DuSaQ che'wI', naD Hevbogh nuv puS, latlh je. tay che' Holtej noy, *David Lightfoot*. nentay rur lopvam, 'ach 'oy'naQ lo'be' ghojmoHwI'. ghojwI' pong jatlhDI' che'wI', chol ghojwI'. mop qIj tuQ Hoch. ghojwI' DubDaq mopHom HuS ghojmoHwI'. (mopHomvam 'oSmeH tera'nganpu', "hood" 'oH DIvI' Hol mu'.) mopHom HevDI' ghojmoHwI', luHoy' DuSaQ che'wI', tay che'wI' je. Holtej jIHmo', *Lightfoot* vIqIHmo' jISeyqu'. pongwIj jatlhlu', 'ej ghojmoHwI'wI' vIchol. mopHomwIj munob. DuSaQ che'wI' vIghoS. muHoy'. *Lightfoot* vIghoS. jIjatlhlaHpa', jatlh ghaH. muHoy'be'. mughel, <nuq 'oH ghItlh'a'lIj qech?> mumerqu'! bej Hoch, yIt ghojmoHwI', DaH loSlI' latlh. ghItlhvam vIQIjmeH lup puSqu' vIghaj. ghaHvaD ghItlhwIj pong vInob, 'ej jItlheD. Hujqu'.
'uQ wISopmeH, Qe' le' wISuch. vIDelmeH tugh QIn latlh vIngeH.
--Holtej 'utlh
SKI: Holtej got his Ph.D.