tlhIngan-Hol Archive: Thu Jan 10 16:18:06 2002
[Date Prev][Date Next][Thread Prev][Thread Next]
juH chu' vIDabchoH
- From: [email protected]
- Subject: juH chu' vIDabchoH
- Date: Thu, 10 Jan 2002 21:18:05 GMT
wa'maH Sochben *Sanan* Du' vIDabchoH. puH pong 'oH Sanan Du''e'. pa' law'
juHmey. *Hay'qu'* 'oH juHwIj wa'DIch pong. pup pongvam. pa' reH Hay'taH
DabwI'pu'. qaStaHvIS wa'maH DIS Hay'qu' vIDab, ghIq *Sor chIS* vIDabchoH.
qaStaHvIS wa' DIS pup Sor chIS. jIQuchchu'. ghIq tlheD wa' DabwI' 'ej
moghchoHchu' ratlhtaHbogh loDnalDaj. tlheD loDnalDaj 'ej moghchoH latlhpu'. Sor
chIS 'emDaq juH machqu' vIchenmoH. *reH pa'* vIpong. cha' qech Del pongvam.
vIparHa'qu'. qaStaHvIS vagh DIS juHvam vIDab 'ej mubelmoH juHvam mach.
DaH bangwI' juH vIDabchoH. pa' bangwI' puqbe'Daj je Dabmo' juHvam vIparHa'qu'.
mach 'ach bangwI' juH tIn law' loS reH pa' tIn puS. reH pa' 'ul chenmoH
pemHov. 'ul motlh lo' bangwI' juH.
reH pa' jIlpu' vIqeltaHvIS, bangwI' jIlpu' vImaS. bangwI' juHDaq SutwIj
vISay'moHlaH. wutlhpa'Daq Sut Say'meH jo' ghaj. reH pa'Daq Sut vISay'moHmeH
bIQtIqnaghDaq SutwIj vImoqnIS. bangwI' juHDaq ngeDqu' Qu'vam.
DaH ngupvaD QuvwIj chu' vIja'nIS. DaH chaq SuyajlaH. reH pa'Daq pawlaw'
HolQeDwIj chu'. vIHevpa', pa' vIghoSnIS. DaHjaj ram vIghoS. vIlaD. jIchegh. mu'
chu' tetlh vInotlhHa'choH.
DaH bangwI' juHvaD pong vIchennISmoH. jIQublI'...
mI' Daq
cha' qech qel pongvam je. mI'a' Daq? mI' Daqlu''a'? jISIvtaH...
pItlh
charghwI'