tlhIngan-Hol Archive: Sat Sep 08 23:36:54 2001
[Date Prev][Date Next][Thread Prev][Thread Next]
Re: jaS bIpotlh
- From: Nick Nicholas <[email protected]>
- Subject: Re: jaS bIpotlh
- Date: Sat, 8 Sep 2001 18:24:38 -0700
jang ghuy'Do:
>nIchyon, bIbepDI' jIyaj 'ach QughHey DalachtaH. lI'pu' Hoch Qu'lIj, 'a
>'Itlhqu'mo', lulajlu'chu'Qo'. wej Holmaj lajlu', maQujba'pu' 'e'
>wImevbe'mo'. batlh 'e' DaDISchu' je. Qu'meyna'maj tu'pa' nugh, ghItlhmey
>muchmey je DIqonbogh 'ej DImughbogh DIghurta'chugh, ghIq Bible paq
>wImughbogh wImuchDI', ghaytan vaj ngeD laj. SengHeylIjmo' Dejlaw'pu' 'op
>DIch, wa' boq je, 'ach not boq lujeSqang latlh SengwI'vetlh, 'ej DIch lughaj
>pagh, mataghchu'DI'.
jIQochnIS. Hoch wIchavchugh je, not lulaj ghot law'qu', SaghlaH Hol
'oghpu'bogh net lajQo'mo'. tlhIngan Hol lulo'chugh wa'vatlh paqmey,
QubchoHbe'lu': "Sagh chaH." Qub neH chaH: "Dogh chaH". Esperanto Hol lulo'
'opnetlh paqmey. Esperanto Hol vuvlu' 'e' DaHar'a'? Esperanto Hol bommey
law'qu' qonlu'; Sagh 'ej Dun bIH. 'a jatlh not net mev: "DunlaHbe' bIH,
Holna' 'oHbe'mo'." vuD ghajDI' ghot law'qu', 'oH tobHa'laHbe' je mInDu'
vItna'.
'ej ram, nulajchugh pagh nulajbe'chugh. Holna' wIghaj, 'e' wISovbej;
nuSchugh je latlh. Qap Holmaj 'e' wISov. thloS rIn je Holmaj, 'e' vIja'meH
jIjaq je; Hol wIlo'meH DaH Dach pagh potlh. (vaj tlhIngan Hol ghu' rurbe'
lojban Hol ghu'; 'ach puptaHghach pIm nejlI' Holvetlh qa'...)
>Sov'e' SoHvo' vIghojbogh tIn law', Hochvo' Sov tIn puS. chay' laj wIchavlaH?
>nem'a' jeSqu' tlhIngan Hol ghom, jatlhmeH 'ej vummeH Holna'vam lulo'taHvIS.
choquvmoH, jup, 'ej qatlho'. 'a laj wIchavbe' --- 'ej tagha', potlhbe',
lughmo' mu'tlheghlIj Qav. 'e' luwuq je "Esperanto"ngan pu', qaStaHvIS 1980
DIS Rauma qep'a': "yay' Qav wIpIHbe'; chavna'meymajmo' maHem DaH net chaw'
je."
'ej wav'eghDI' Esperanto Hol, qaStaHvIS 1908 DIS, lotlhmo' "Ido" Hol
tlhejwI'pu', Esperanto Hol toD Theophile Cart. (tagha' toDbe' Zamenhof'e',
moSqangmo' 'ej lot jun 'e' nIDlI'mo'.) toD qapmo' 'ej mulmo' ghaH. nuq
jatlhmo' ghaH? "Ni fosu nian sulkon." "nIteb lam tlheghmaj wIteqjaj." vaj,
nIteb mapochjaj.
nunaDchoHmo' Qovpatlh, machepchoH'a'? ghobe'. Holmaj Sorghmo' Duj ngaDHa',
marIQ'a'? ghobe'. He lugh wIghoS, 'e' wIHonbe'; yap.
Nick Nicholas, UCI, USA. [email protected]
http://www.tlg.uci.edu/~opoudjis
"Must I, then, be the only one to be beheaded now?" "Why, did you want
everybody to be beheaded for your consolation?" Epictetus, Discourses 1.1.