tlhIngan-Hol Archive: Mon Apr 30 20:04:35 2001
[Date Prev][Date Next][Thread Prev][Thread Next]
reH Dogh charghwI' net Sov
- From: "Will Martin" <[email protected]>
- Subject: reH Dogh charghwI' net Sov
- Date: Mon, 30 Apr 2001 23:04:09 -0400
- Importance: Normal
wejHu' jImI'choHmeH qelI'qam law' vIlengchoH. chan tIng vIghoS. wanI'Daq
vIpawpa' jupna' juH vIghoS. mutlhej 'ej wanI' wIghoS. pongDaj vIparHa'qu':
*San* ("Shawn"). SanwIj moj *San* vIneH 'ach ghaytanHa' qaS. bangna'
ghajbej. qay'be'. Quchmo' *San* jIQuch 'ej jupna'wI' ghaHtaH. malengmeH
*San* nIv law' Hoch chIjwI' nIv puS. DeghwI' jIH. be' ghaH 'ach tlhoS
maqochwI' ghaH. le'.
DunluQ yaHwIjvo' jItlheD. megh vISop.
wa'maH wejvatlh wejmaH rep vengwIjvo' jItlheD.
wa'maH loSvatlh wejmaH rep jupwI' juHDaq jIpaw. puHDujwIjDaq DochmeyDaj
DIlan.
wa'maH vaghvatlh wejmaH rep matlheD.
wa'maH Sochvatlh wejmaH rep wanI'Daq mapaw. jeSwI' tetlh wIqI'. Deghmey
DISuq. juHHommeyDaq QongDaqmey DISam 'ej Dochmeymaj DIlan.
wa'maH chorghvatlh wejmaH rep 'uQ wISop.
cha'maHvatlh rep mamI'choH.
wanI'vammo' jIQuchqu'. pa' juppu' law' vIghom 'ej juppu' puS vIqIH.
jImI'chu' 'ej jIchuSqu'. jIjach. pe'vIl rav vIgho'chu'. rav vIchuSmoH.
'o'lav rur.
ghem wISop. jIQong.
cha'Hu' Sochvatlh rep jIvem. jISay''eghmoH 'ej nIQ vISop. wanI'vaD 'eychu'
Soj. jISopta'DI' QoQjanHom vIchu'. woSwIj bIngDaq volchaHwIj DungDaq janvam
tlhuQqoq vIlan. poSwIj ghopDaq janvam mongqoq vI'uch. Ha'DIbaH tlhuQ pob
'uch Sor Hap naQ. nIHwIj ghopDaq naQvam vI'uch. janvam vIDelpu'mo' janvam
DaghovlaHbe'chugh, vaj qay'. jIbup. Daghov pagh Daghovbe'. jISaHbe'.
megh vISop. jIlaDchoH. paqmey QaQ vISuqta'. *Duch* Hol pab Del wa'. latlh
per <<*Buddha* *date*pu'chugh>>.
'uQ vISop. jImI'qa'. jImI'taHvIS jIQuchqu'. mutIv mI'wI' law'. parmaq
vISaHbe'. bang vIHutlh 'e' vISaHbe' je. jImI'taH neH.
mutlhejchoH be'. 'IH. jISaHbe'. mI'laHchu' 'e' vISaH. mon. jISaHbe'.
mamI'chu' 'e' vItIv.
mamI' 'e' wImevDI' mu'uch. pe'vIl vIH tIqDaj. QItqu' paw' ro'maj. tIqDaj
vIHotlaHlaw'. vIDuQlaw'. muDuQbej.
jImI'taHvIS latlhpu' vIthej 'ach be'vam vItlhejqa' 'ej vItlhejqa'.
muja' DujwIj. potlh be'vam. lutmeyDaj vI'IjnIS. vIyajnISchoH.
ghaytan tagh lutwIj chu'.
charghwI' 'utlh