Re: Qatlh DotlhwIj

["William H. Martin" <whm2m@virginia.edu>]

> ja' SarrIS:
> >... Qun vIHutlh. jIjatlhchugh muQoy 'Iv? jISIv neH.

jang ghunchu'wI':
> bISIv neH, 'ach jIjangqang.

> bIjatlhDI', Qoybej qa'lI'.  jatlhtaHvIS yablI', ghu' 
> qellaH qa'lI'.  chIch bIQubnIS'a'?  ghobe'.  yIvang, 'ach 
> bIvangtaHvIS qa'lI' yIvoq.  chaq DuDuQ qech 
> bIpIHbe'taHvIS.  DuchuH'a' Qun?  SovlaHbe' vay', 'ach ram.
> Dajanglu'chugh, potlhbe' Hal.

> -- ghunchu'wI' 'utlh

qatlho' jupwI'. bIjatlhchu'ta'. rut QoyQo' qa'wI' 'ej 
jImoghqu'choH. qaSDI' ghu'vam jIloSnIS 'ej jItamnIS 'ej 
jItuvnIS 'ach roD jIQIptaHvIS jIjatlh. ghIq jIpay.

DaH jImogh. yaHDaq puqpu' QIp vItoy'. jatlh wa':

<<QoQ vIQoymeH *Napster* vIlo'taHvIS, HaSta Qatlh vIleghmeH 
*Netscape* vIlo' 'ej QoQ DISchoHlu'. De'wI'wIj yItI'!>>

jatlh latlh:

<<much'a' vIbejmeH *DVD* vIlo'taHvIS *AOL Instant 
Messenger* vIlo'. paw QIn 'ej mev much'a'. De'wI'wIj 
yItI'!>>

De'wI' luqotlhbe'ba' qoHpu'vam. roD jISaHbe'. QIplaHtaH 
nuvpu' QIp. jImon neH. jItaH. vIQaHlaHDI' vIQaH. qay'be'.

'ach rut jItuvHa'. HughDaj vI'uch 'ej QeychoH ghopDu'wIj  
vIneH. DoqchoHchugh qabDaj jIQuchchoH. ghurchugh mInDu'Daj 
jImonchu' 'e' vInaj.

'ach vItna' vISov. qay'be' ghu'vam. qay' latlh. jImobbe' 
vIneHDI' jImobtaH. yap. jIqejlI' neH.

ram.

ram ghu' 'ej jIram.

SarrIS