tlhIngan-Hol Archive: Fri Mar 03 16:59:11 2000
[Date Prev][Date Next][Thread Prev][Thread Next]
SI'ra, the unexperienced witch
- From: [email protected] (Christiane Scharf)
- Subject: SI'ra, the unexperienced witch
- Date: Sat, 4 Mar 2000 02:02:57 +0100
Dalmo' DaHjaj, lut vI'ogh 'e' vIwuq.
I'm bored. So I decided to write a little story. It's about young SI'ra, who
has the potential to become a powerful witch, but who still needs a lot of
experience.
le' SI'ra. laH nIvqu' ghajba'. bomHey le' bomDI', Dochmey Ha'DIbaHmey nuvpu'
joq SIghlaH. 'ach Qup SI'ra. wej laHvam SeHlaHchu'. vaj rut Qagh. QaghDI'
SI'ra, ghaHvaD pIj qay'qu'choH ghu'. wa' qay'chu'bogh ghu' vIDel.
qaStaHvIS ram bIr, QongDaqDaq Qot SI'ra. 'ach bIrmo' pa' muD, QonglaHbe'.
vaj bom le' bom. jatlh:
<<bIrqu' muD 'e' vInoH.
pa', qara', yItujchoH!>>
jatlh SI'ra 'e' mevDI', SIbI' tujchoH muD. QuchchoH SIra'. QongchoH.
'ach QongtaHvIS SI'ra, tujchoHtaH muD. 'ej tujchoH latlh Dochmey je: tujchoH
raS, tujchoH quSmey, tujchoH paqmey, tujchoH Hoch. tujchoHtaH.
pay' vem SI'ra. tlhIch He'. tujchoHtaH Hoch, 'ej meQchoHpu' paqmey law' cha'
yIvbeHmey je!
nom Sach qul. rav meQmoH. tlhoy'mey toS. quSmey Sop 'e' nIDba'.
QIt ghu' tlhojchu' SI'ra. Do8'Ha' qul HoHmeH jan ghajbe'. Do'Ha' bIQ
SIchlaHbe'. vaj bomnISqa' 'e' wuq. wej ghu'vamvaD bomna' Sovmo' SI'ra, nom
bom 'oghnIS. nID. jatlh:
<<tuj qul je vISIQ.
vIneHbe'. vaj pa', yIyIQ!>>
Qaplaw' bomvam. paw bIQ law'. qul Suv bIQ. law'qu'mo' bIQ, qul jeychoH.
jeghlI' qul. puSqu'choH meQlI'bogh Dochmey. tagha' yay chav bIQ.
juHDaj toDta' SI'ra. 'ach pa'Daj Qaw'pu'. Duy'chu' Dochmey law'. ratlh
chuvmey qIj neH. yIQqu' Hoch. bIQmo' Duy' 'ul lo'nISbogh janmey'e'.
QIH'a'vam bej SI'ra. 'IQqu'. HoS law' natlhmo' bommeyDaj le', puj ghaH.
'ach pa' QIHHa' neH. wa'logh bom le' bommeH chaq yap HoSDaj. bom HoSghajqu'
bomnISba'. wej bommey HoSghajqu' qeqpu' SI'ra, 'ach mu'mey Sov. vaj waH.
jatlh:
<<DaH mujchu' ghu'na'.
qo' qa''a', qapoQ!
ta' qab yIta'Ha'!
lujwI'na' yIboQ!>>
rInDI' bom, pay' wov Hoch. Hurghqa'DI' pa', qaSpu' lot net HarlaHbe'bej.
qay'be'qa' pa'. 'ach HoS law' natlhpu' bom Qav. ravDaq Qot SI'ra. vul.
SI'ra SoS vemmoHpu' wab. DaqchoH ghaH. pagh Qoy, 'ach muD Hujlu'law'pu'.
Seng pIH SI'ra SoS. laH le' ghaj je ghaH: DujDaj'e' reH voqlaH.
vaj SI'ra pa' 'el. vul puqbe'Daj 'e' tlhoj. SIbI' QaH. Huvqa'DI' SI'ra yab,
wanI'mey Del SIra' 'e' ra' SoSDaj. jatlh:<<lut naQqu' HIjatlh! bInep 'e'
yInIDQo'! bInepDI' bInep 'e' vItlhoj. 'e' DaSovchu'.>> 'omlaHbe'mo' SI'ra,
lut naQ jatlh.
QeHchoH SoSDaj. jatlh: <<qatlh bomvam HoSghajqu' Dalo''a'? HoSlIj Hoch
natlhlaH bomvammey HoSghajqu' 'e' DaSovchu'. yInlIj potlh potlh pa'vam potlh
ram. qatlh bIQIpqu'pu''a'?>>
Hub'egh SI'ra, 'ach ngachmeH SoSDaj po' law', ghaH po' puS. vaj SI'ra bIj
SoS. qaStaHvIS cha' Hogh bommey le' lo' SI'ra 'e' tuch SoS. SI'ra nuQqu'
bIjvam, Hoch Qu'mey ta'meH vumnISmo'. vay' Say'moHmeH vumnIS. pa'Daj
ghIHHa'moHmeH vumnIS. DuSaQ Qu'meyvaD vumnIS. latlh Qu'meyvaD vumnIS je.
jatlh: <<ghay'cha'!>>
HovqIj