tlhIngan-Hol Archive: Mon Feb 07 21:08:07 2000
[Date Prev][Date Next][Thread Prev][Thread Next]
*Egypt*ngan DIp vIbuS.
- From: [email protected]
- Subject: *Egypt*ngan DIp vIbuS.
- Date: Tue, 8 Feb 2000 00:07:37 EST
Dol Daq Doch ghap Del DIp. (DIp 'oHbej pong'e',
'ach *Egypt*ngan pongmey vIbuSbe'.) *Egypt*ngan
HolDaq cha' DIp Segh tu'lu'. wa' Segh 'oH loD
DIp'e'. latlh Segh 'oH be' DIp'e'. be' DIp per <t>
QIch, 'ach loD DIp per Hoch QIch ({puqbe'} 'oS
<sAt> [be' DIp 'oH mu'vam'e']; {ghItlhwI'} 'oS <sS>
[loD DIp]; {vav} 'oS <it> [loD DIp]).
loDpu' Del loD DIpmey, 'ej be'pu' Delba' be' DIpmey,
'ach Dochmey Del loD DIpmey, be' DIpmey ghap ({juH}
'oS <pr> [loD DIp]; {Doch} 'oS <xt>) [be' DIp]).
motlh be' DIpmey bIH Daqmey'e' ({*Egypt* Sep} 'oS <kmt>).
(chaq tlhIHvaD Daj ngoDvam: {qIj} 'oS <km>, vaj {Sep
qIj} 'oS <kmt>.)
Dolpu' Daqmey Dochmey ghap DaDel DaneHchugh, vaj
DIpvaD mojaqmey le' DachelnIS. loD DIpvaD <-w> mojaq
DachelnIS, 'ej be' DIpvaD <-wt> mojaq DachelnIS
({juHmey} 'oS <prw>; {Dochmey} 'oS <xwt>). motlh
<-(w)t> mojaqmey ghItlhlu'be', 'ach wejlogh Degh le'
ghItlhlu'. yIqIm: mu'mey {loD+++}, {juH+++}, {DeS+++}
DalaDchugh, 'ej mu'mey {loDpu'}, {juHmey}, {DeSDu'}
DayajnIS 'e' Hechchugh ghItlhwI', vaj loQ mIwvam rur
*Egypt*ngan DIpmey 'oSmeH mIw.
-- ter'eS
http://www.geocities.com/teresh_2000
http://www.geocities.com/weseb_2000