tlhIngan-Hol Archive: Sat Nov 06 10:09:49 1999
[Date Prev][Date Next][Thread Prev][Thread Next]
tera' DIS cha'SaD wIch
- From: "David Trimboli" <[email protected]>
- Subject: tera' DIS cha'SaD wIch
- Date: Sat, 6 Nov 1999 12:06:33 -0500
- Organization: Microsoft Corporation
- References: <[email protected]>
jatlh charghwI':
> Sengna' 'oH'a'? Haj nuvpu' law' 'ach De'wI'mey yajHa' HochHom.
> reH wIchmey Qoylu' 'ach not Sengna' vItu'. Sengna' DaSamta'chugh
> yIDel.
teHbej: tera' DIS cha'SaD wIch law' Har nuvpu'. tlhaQ HochHom wIch. nuQ
puS. ram HochHom wanI'mey 'e' vIHar.
<Cold Spring Harbor Laboratory> De'wI' chamwI' jIH. pa' mughIjqu'be' tera'
DIS cha'SaD. wIQulta', wIghuHta', matobta'. (maDajqu'be'ta' 'e' wItul!)
ghaytan De'wI'majvaD ram DIS chu', 'a wIqellI' 'e' vImevbe'. DIS chu' lop
chuppu' pInma': <December> wejmaH wa', cha'maH loSlogh Qoylu'pa', De'wI'
pa''a' maghom 'ej malop. HIq tlhutlhwI'vaD HIq je' pIn (HIq vItlhutlhbe',
vaj <soda>, latlh joq vItlhutlh).
tlhaQ pInma' chuppu'ghach. taghDI' DIS cha'SaD, QaghchoHchugh De'wI'mey,
SaH Hoch De'wI' chamwI'pu'! SIbI' Qagh DItI'choHmoHlaH, 'ej ghIq maHvaD
QeHbe' tejpu' potlh. (ghu'vam wIchaw'laHbe': vummeH pa' 'el <Jim Watson>
'ej QaghtaH De'wI' pat 'e' tu'! 'ej bep latlh tejpu' potlh 'e' lutIvlaw';
latlhmeyvam chuS law' <Watson> chuS puS.)
Do'Ha', maloptaHchugh, chaq chechchoHpu' chamwI'pu'! QapHa'chugh De'wI'
patmaj, tI'meH buSlaHchu''a'? SaH'a' wa' chechbe'taHbogh chamwI' (jIH) neH?
Hee!
ghaytan qID neH pInma'. De'wI' pa'a'Daq malop 'e' wInabbe'.
SuStel
Stardate 99848.6
P.S.: Qagh'a'mey qaSmoHchugh tera' DIS cha'SaD, taghpu'qu'. le'be'
<January> wa'.