tlhIngan-Hol Archive: Wed Mar 17 17:05:24 1999
[Date Prev][Date Next][Thread Prev][Thread Next]
Qapbe' DujwIj
- From: "Andeen, Eric" <[email protected]>
- Subject: Qapbe' DujwIj
- Date: Wed, 17 Mar 1999 18:08:10 -0700
DaHjaj po, 'eqqu'taHvIS rep, muvemmoH QumwI'. vIrI'lu'law'. vIbuSHa'.
jIQongqa' vIneH. QumwI' vISaHbe'bej. vIrI'qa'lu' 'ej vIrI'qa'lu'. Qu'vatlh!
QumwI' vISam 'ej vIchu'. murI' be'nalwI' 'e' vItu'. jIqej. jIjatlh
<nuqneH?>. jatlh <beQchoHpu' DujwIj *tire*. yItI'.>. vIjangmeH jIjatlh <lu'.
DaH jIQongqa', 'ach qaSpu'DI' wej rep, yaHlIj vIghoS 'ej DujlIj vItI'>.
jIQongqa'.
*Maricopa* yoS bo'DIjDaq vum be'nalwI', 'ej be'nalwI' vIghomta'DI', bo'DIj
Duj qachDaq DujDaj wISam. *tire* DuQpu' baS DuQwI'. loQ *tire* jeqtaH DuQwI'
tIH. nIjchu'pu' *tire*. qay'chu'be'. Duj 'o'Daq *tire*-Hom, *tire* jommeH
luch je vItu'. *tire* beQ vIteq 'ej *tire*-Hom vIjom. *tire* Suy wIghoSrup.
DujwIj chIj be'nalwI', 'ej DujDaj vIchIj. He wa'maH HutDIch vIghoStaHvIS,
jorlaw' *tire*-Hom. Qu'vatlh ghuy'cha' baQa' jay'!!!!! *parking lot*
vIlegh, vaj vIghoS. Huch Hung loH (Department of Economic Security) retlhDaq
jImev. (nuq 'oH Huch Hung loH jay'? Huch lu'avbe'ba' loHwI'pu'vam Dogh.
qatlh <Hung> lupong'egh? nuq luta'? jISovbe'chu'.) mujatlh loH 'avwI'qoq
<qay' nuq>. DIvI' Hol jatlhlaHchu'be'. <beQ *tire*, 'ej beQ *tire*-Hom.
DujwIj vIchIjlaHbe'chu'. *tire* chu' vIje'meH jIruch>. be'nalwI' vIrI'
(lengwI' QumwI'mey DIqeng maH), 'ej DaqwIj Sam. *tire* Duy' wItlap 'ej
DujwIjDaq *tire* Suy wIghoS.
*tire* tI'lu'taHvIS, yaHDajDaq be'nalwI' vIlup. *tire* SuyDaq jIchegh 'ej
*tire* tI'lu'bogh vISuq. be'nalwI' Duj Daq vIghoS. jIpawDI', QeHqu' loH
'avwI'qoq. <naDev bImevlaHbe'> jatlh. <latlh DaqDaq DujlIj yIvIHmoH> jatlh.
jIQeHchoH je jIH jay'. <vIHlaHbe'bej Dujvam jay'> jIjatlh. <choSuj 'e'
yImev> jIjatlh. *tire* chu' vIjom 'ej be'nalwI' Duj vIvIHmoH. He DopDaq
jImev. DujwIjDaq jIchegh 'ej mughoS 'avwI'qoq. QeHlaw'taH. jatlh <DujlIj
yIvIHmoH. naDev 'oHtaH DujlIj net tuch>. jIQeHtaH je jIH. jIDuv 'ej HeD
'avwI'qoq. jIjatlh <SoHvaD qay' nuq jay'?>. jIjatlhqa'. Suvruplaw' 'avwI'qoq
'ej jISuvrupbej jIH. qan 'avwI'qoq. pI' 'ej run. maSuvchugh, vIjeyba'.
Doghbej. 'ach jISuvqangbe'. tera'Daq maHtaH, 'ej Humanpu' maH net Sov, vaj
'avwIqoqvam vISuv net tuch. DujwIjDaq jIyIt 'ej jImej. pItlh.
pagh