tlhIngan-Hol Archive: Wed Jun 23 11:57:11 1999

Back to archive top level

To this year's listing



[Date Prev][Date Next][Thread Prev][Thread Next]

Re: *weekend*wIj



On Wed, 23 Jun 1999 02:04:33 -0400 Captain Krankor 
<[email protected]> wrote:
> 
> vogh'e' Devbogh charghwI' jItlha'qang.  *weekend*wIj vIDel.
> 
> *weekend*vam <<vav jaj>> loplu' 'e' boSovba'.  lopmeH tay' qorDu'maj naQ
> 'e' wIv SoSnI'wI'.  vaj Qe'Daq 'uQ'a' nabta'.  qanqu' SoSnI'wI' vavnI'wI' je,
> vaj ghomDI' qorDu' reH chIch jISaH; chaq Qav tay'meH 'eb -- net Sovbe'.

HIvje' DIngDaq HIq 'ey law' Hoch 'ey puS. qorDu'lIj DatIvlaHmo' 
jIbel.
 
> toH, *New Jersey*Daq jIlengnIS.  Do'Ha' *Friday* yaHwIj vItlheDlaHpa' paSchoHpu'
> rep.  paw ramjep juHwIj jItlheDruppa'. 

Do'Ha'. wanI' le'mo' bIpaSbe'nIS 'e' yajnIS pInlI'.

> SoSwI' vavwI' je juHDaq vIghoS.  loS
> rep lupoQlu'.  juHchajDaq jIpawDI', pawlI' je po.  {{:-)

batlh bIvangta'. bIDoj. <<maSopnISbe', maQongnISbe' 'ej 
maDo'chugh matlhuHnISbe'...>>
 
> pawDI' pov muvemmoH vavwI'.  vavnI'oy SuSnI'oy juHDaq jaHpu' SoSwI'; matay'DI'
> maleng vavwI' jIH 'e' wInabta'.  DujHomDaj muSHa'qu'mo' vavwI', 'oH wI'lo'.
> *convertible* 'oH, 'ej 'IHqu'mo' jaj, beb wIpoSmoH.  vItIvqu'.  cha' rep
> poQ lengvam.  malengtaHvIS jIvemHa' 'ej loQ DeSwIj meQ Hov'a'.  'ach jISaHbe',
> jItIvqu'.

'eyba' wanI'.
 
> toH, mapaw 'ej tugh Qe'Daq ghoS qorDu' naQ.  SaH jIH, vavwI', SoSwI', vavnI'oy,
> SoSnI'oy, be'nI'wI', loDnalDaj, puqloDchaj, SoSwI' be'nI', loDnalDaj, puqbe'chaj,
> vavwI' loDnI', vavnI'oy vavnI' SoSnI' ghap puqloD puqbe' ghap puqloD
> (jISovchu'be'),...

chowuQmoH. jIyajmeH navDaq jIghItlhnIS. tIq He 'ej tlhe'qu'.

>  be'nalDaj, jupchaj je.  tugh Qe'Daq nughom SoSnI'wI' latlh.
> loQ wImermoHlu'.  Dach ghaH net pIH.  belqu' Hoch.  jIbelchu' jIH.  be'nI'vam
> vIparHa'qu' 'ach pIjHa' vIlegh.
> 
> pov 'uQ 'ej tIv Hoch.  matIv'chuq, yaj'a'?

jIyajchu', qaH.
 
> rInDI' 'uQ vavnI'oy SoSnI'oy juHDaq chegh Hoch.  maba' 'ej majaw.  QIt
> tlheD nuvpu'.  rInDI' lopno', ratlh jIH vavwI' SoSwI' vavnI'wI' SoSnI'wI' je.
> pa' maQong.  "South Park" chu' vIbejmeH nIteb jIQongbe'taH, vaj paS rep
> QongDaqwIjDaq jIpaw.  jIQongchu'.

rInDI' jaj'a' Qonglu'chu'; targh chech rur.
 
> pawDI' pov muvemmoH vavwI'. 

po nuv SoHbe' net Sov.

[I really like the ambiguity of that sentence. Both meanings are 
quite applicable.]

> tlheDta' SoS 'ej tlheDmeH muloStaH.  vaj jIvem.
> megh wISop Hoch maH (vavwI', vavnI'wI', SoSnI'wI', jIH je).  maSop, majaw,
> maHegh, matIvchuq. 

nuqjatlh? lopmeH mIw DaSovchu'! {{:)>

> QaQ.  rInDI' megh, *scrabble* wIQuj wIneH vavnI'oy jIH
> je, 'ach tlheDrupchu' vavwI', vaj metlheD.  Do'Ha'.  *scrabble* wIQuj reH
> 'e' vItIvchu'.  'ach <<vav jaj>> 'oH vaj vavwI' vIbelmoH vIneH je.

batlh bIvang.
 
> toH vavwI' SoSwI' je juHDaq machegh.  Do'Ha' QIt malengnIS He lo'taHmo'
> yuQHey naQ.  DuHchugh, *Garden State Parkway* yIlo'Qo'.  natlh.

qeSlIj vIqawtaH.
 
> macheghDI', 'uQ wISop vavwI' SoSwI' jIH je.  Hur vutmeH Ha'DIbaH meQ
> vavwI'.  reH 'e' tIv.  'ej nay'mey Sar vut SoSwI'.  'ey.  reH ghomDI'
> qorDu'wIj maSopchu' 'e' botu'lI', qar'a'?  teHqu'. {{:-)

yInlu'chu'meH SopnISlu'chu' net Sov.
 
> paSDI' rep, jItlheDnIS (jaj veb jIvumnISqa').  toH, jImej 'ej lengchoH.
> 
> pIj lengvam vIleng 'ej vISovchu'.  leng bIDna'Daq Qe'Hom ("diner") pov
> tu'lu'.  qaStaHvIS ram naQ poStaH.  pIj pa' jIyev 'ej pImbe' ramvam. {{;-)
> Qe'HomDaq ghem vItIvqu' 'e' boSov qep'a'Daq SuSaHbogh tlhIH law'!  Do'Ha'
> *snapper soup* lughajbe', 'ach pov *grilled cheese & bacon*chaj 'ej pup
> *chocolate egg cream*chaj.  nay'meyvam vISoppu'.  reH pa' nay'mey rap
> vISoplaw'. {{:-)

'eychugh nay' vaj qatlh choH?
 
> rInDI' ghem lengwIjDaq jIjaHqa'.  chIm He 'ej nom jIjaHlaH.  qaStaHvIS
> poH nI' ta'e' vI'Ijbe'bogh vISamqa' 'ej vI'Ijqa' 'ej vItIvqu'.  be'nI'pu'
> *Andrews* bommey nIv ngaS.  cha'logh ta naQ vI'Ij 'ej jIbomtaH je.  bom
> vImaSqu'bogh 'oH "Hold Tight"'e'.  boSov'a'?

jIghovbejmeH yapbe' pongvam. chaq vI'Ijchugh vIghov.
 
> toH, juHwIjDaq jIchegh.  paSqu' rep.  jIQongchoH.  rIn *weekend*wIj.
> 
> pItlh.
> 
> 	--Qanqor
 
charghwI'



Back to archive top level