tlhIngan-Hol Archive: Thu Jun 17 11:40:49 1999
[Date Prev][Date Next][Thread Prev][Thread Next]
Ha'DIbaH vItoDta'.
- From: "William H. Martin" <[email protected]>
- Subject: Ha'DIbaH vItoDta'.
- Date: Thu, 17 Jun 1999 14:40:36 -0400 (Eastern Daylight Time)
- Priority: NORMAL
DaHjaj po yaH vIghoS. puHDujHom vIlIgh. HewIjDaq nargh
lIghmeH Ha'DIbaH. 'IHqu' 'ach Seyqu'. lengtaH 'ej lengHa'taH.
puHDujmey bot Ha'DIbaHvam. Hoch Hajlaw'. tayHa' mInDu'Daj.
QIt vIjuS 'ach jIQubqa'. Ha'DIbaHvam QaHnISlu'ba'. QaH 'Iv? tugh
ghaytan Ha'DIbaHvam ngeQ latlh puHDuj 'ej HoH.
DopDaq puHDujwIj vImevmoH 'ej vImej. Ha'DIbaH vIghoS.
mubejtaHvIS puHDujmey DeghwI'pu', Ha'DIbaH vIjotchoHmoH.
mongDajDaq DubDaq jIbHey vI'uch 'e' vInID 'ach lI'be' mIwvam.
mongDaj Dech DeSwIj 'ej vI'uch. DaH narghlaHbe'. QIt DopDaq
vIyItmoH. tugh qach vIlegh.
Ha'DIbaH vI'uch 'ach vI'uchHa'chugh lengqa'laH. qay'.
vIQaHnISlu'. SIStaH. jIyIQtaH. Ha'DIbaH vIra'. jIjatlh
<<bIratlhbe'chugh vaj bIHegh!>> vI'uchHa' 'ej qach vIghoS.
jIrI' 'ej jIrI'qa' 'ach jangbe'lu'. qach veb vIghoS. chIm. qach
wejDIchDaq loDnal be'nal puq je vItu'. ghogh HablI'Daj vIlo'.
cha' nuv vIrI' 'ach jang qoq ghoghqoq neH. wejpuH.
Ha'DIbaHvaD naH qeng loDnal. valba'. nom Ha'DIbaH wIghoS; maqet
'ach nargh. SIStaH. mayIQtaH.
puHDujHomwIj vIghoS 'ej yaH vIghoSrup 'ach Ha'DIbaH legh loDnal.
Ha'DIbaH vIjontaHvIS qach Sum ghoS loDnal. chevwI' tlhoy' wIghoS
Ha'DIbaH jIH je. Ha'DIbaH Sevlu'DI' yaH vIghoSlaH.
jIyIQ. SutwIj nguvmoH naH. jIHe'So'; Ha'DIbaH vIrur.
vaj qabchugh jajlIj, jIHvaD yIvIngQo'!
charghwI' 'utlh