tlhIngan-Hol Archive: Mon Dec 20 14:06:39 1999
[Date Prev][Date Next][Thread Prev][Thread Next]
ngoQwIj
- From: "William H. Martin" <[email protected]>
- Subject: ngoQwIj
- Date: Mon, 20 Dec 1999 17:06:03 -0500 (Eastern Standard Time)
- Priority: NORMAL
yInwIj'e', nuq vIneH? nuq 'oH ngoQ'a'wIj'e'? chaq ngoQ vIHutlh.
'ach batlh jIyIntaH. jISuvmeH neH jISuvqangbe'. pe'beHchu'meH
'etlh jejmoHlu'. pe'nISbe'lu'DI' reH pe'lu'taHchugh vaj
pe'nISDI' jejHa' 'etlh.
DaH jIpe'nISbe'. potlh vIloSnIS neH. vaj potlhvam vIloSchu'
vIneH.
cha'Hu' lop jupwI'pu' law'. lopno' ghIHDaq pa' vISay'moH qaSpa'
lopno'vam 'e' vIlay'.
[After all these years, I just got another pun. Pronounce {lay'}
out loud and think of it as the verb to promise. When someone
promises something to you, they {lay'}.]
lopno'vamDaq jIjeS 'e' vIHech 'ach pawDI' wanI' qechmey law'mo'
teb yabwIj 'ej jIDachtaH. 'ach wa'Hu' batlh jIpaw 'ej pa'vetlh
vISay'moH. lop nuvpu' law' 'ach paw wa' Say'moHwI' neH: jIH.
qaStaHvIS cha' rep pa'vam vISay'moH. batlh jIvangtaHmo' Qu'vam
vItIvqu'. vIrInmoHta'DI' paw wej juppu'. *Toy Story 2* wIbejmeH
veng wIghoS. jajvam vItIvqu'.
vaj wa' ngoQHom vIchavta'. Qu'Hom quv vIchav. chaq yInwIjvaD
Qu'Hommeyvam vIchel 'ej wa' Qu''a' rur.
charghwI'