tlhIngan-Hol Archive: Sun Aug 29 17:48:38 1999

Back to archive top level

To this year's listing



[Date Prev][Date Next][Thread Prev][Thread Next]

QongmeH lutmaj



chorghHu' juppu'wI' DISuchmeH jIH, wej latlh je, Plattsburgh, New York wIjaH.  Justin Jessica je bIH pongchaj'e'.  wa'maH wa'Hu' boghpu' ghuDaj wa'DIch, Jacob, 'ej DISuch boghpu'DI' ghu 'e' wIwuq.

Long Island wIDab jIH latlh je.  Lee, Kathy, Rares je bIH pongchaj'e'.  Queens luDab Rares Kathy je.  vaj loQ lengchaj tIqbe' law' Lee leng lengwIj je tIqbe' puS.  vaj Rares "car" lulo' Rares Kathy je, 'ej Lee "car" wIlo' jIH Lee je.  mej Rares Kathy je, qaS HutmaH tup, mamej jIH Lee je.

nom vIH "car"meymaj!  nom!  HochHom wIjuS mavIHtaHvIS.  "Cell phone" DIlo' maja'chuqmeH.  qaS jav rep, PlattsburghDaq mapaw.

Justin Jessica ghu je DISuch.  malop 'a ghuvaD matam.

DaH maQongnIS.  mebpa'mey DISamnIS.  qay'be'!  PlattsburghDaq mebpa'mey law' tu'lu'!  'a wa'logh Qoylu'pu', vaj Qatlh Qu' 'e' wInoH.

DuHbe' Qu'!  Hoch mebpa'mey luDablu'taH!  mebpa'mey law' DISuch, luDablu'chu'taH Hoch jay'!  maQonglaHbe' mebpa'mey DISamlaHbe'chugh!

mebpa'mey DISammeH Canada wI'elnIS!!  maQongmeH veH'a' wIjuSnIS!!  ghuy'cha'!  'a tlhaQqu' ghu'maj.  veHDaq numev 'avwI'; nughel, jatlh qatlh Canada bo'el boneH?  majang, majatlh maQong neH wIneH!  ma'el Do' 'e' chaw' 'avwI'.

vaj Montreal wIjaH.  mebpa'mey law' tu'lu'.  'a luDablu'chu'taH jay'!!!!!!  jIHarlaHbe'.  nuQaH wa' mebpa'mey vu'wI': latlh Montreal mebpa'mey rI' 'ej mebpa' Dabbe'lu'taHbogh Sam.  Saturday MontrealDaq wa' mebpa' neH tu'lu' jay'!  jIHarbe'taH.

wagh mebpa'vam, 'a latlh mebpa' wISamlaHbe'.  tIn mebpa'; cha' QongDaqmey tu'lu'.  leng wItIvchoH.  maSop (reH mebpa' DabwI'vaD Soj qengwI' wISam), maQong.

po veb mavem.  Montreal wIlegh 'e' wIwuq.  wa'logh Canada vISuch (Niagara Falls), 'a not Canada veng vIlegh.  not Montreal luleghpu' latlh, vaj maSey.

pIj New York veng vIlegh, vaj Say'qu' Montreal 'e' vInoH.  French English je jatlhlaw' Hoch.  (DabwI'pu'vaD tlhIngan Hol vIjatlh 'e' luchup juppu'wI', 'ej Romanian jatlh Rares 'e' luchup.  tlhaQ.)

Old Montreal wISuch je, 'ej pa' maSop.  reH nIQ jabbogh Qe' wISam.  ("Eggcetera" ponglu'?  pong tlhaQ vIqawchu'be'.)  nujabtaH Serge.  wIparHa', vaj "tip" tIn wInob.  Qe'vam boSuchchugh, Serge yInej.

Plattsburgh wIchegh.  Dajchu'be' ratlhbogh leng.  Sunday mej Kathy Rares je, 'ej mebpa' chu' wISam jIH Lee je.  (DaH ngeD; wa'maH Sochlogh Qoylu'pu'pa' mebpa' wIDIl.)  Monday machegh jIH Lee je.


SuStel
Stardate 99659.5


Back to archive top level