tlhIngan-Hol Archive: Thu Aug 05 14:10:25 1999
[Date Prev][Date Next][Thread Prev][Thread Next]
De'wI'HomwIj vIDub rIntaH
- From: Alan Anderson <[email protected]>
- Subject: De'wI'HomwIj vIDub rIntaH
- Date: Thu, 5 Aug 99 15:35:02 EST
<toch DeghwI'>wIjDaq bobcho' chu' vIjomta'. qawHaq tInmoH bobcho'vam.
'otlh HablI' chel. DaH <toch wej> Dachu' De'wI'HomwIj. 'ach Qatlhqu'
wanI' vISIQpu'bogh. 'Iw bIQtIqDaq jIlengpu'.
qep'a' vIghoSpa', cha' DubmeH bobcho' vIje'. <toch DeghwI'> lo' je
be'nalwI', 'ej De' wItammeH lI'bej 'otlh HablI'. janwIjDaq bobcho'
vIjomDI', De'wI'HomwIj vIHoHlaw'. QapHa'law'mo' bobcho' chu', bobcho'
ngo' vIjomqa'. Qapqa' De'wI'Hom. bobcho' chu' cha'DIch vIjom 'e'
vInID. Do'Ha' QapHa'chu' De'wI'Hom. 'arghpu' ghu' -- Qapbe' je
bobcho' ngo' jay'.
jIbItqu'choH. De'wI'HomwIj vIHutlhchugh, chay' jItaH? nIjlaw' QoghIj
'ej yInwIj vIloHchu'meH cham vIwuvqu'. qaStaHvIS wa' jaj Qapbe'taH
janwIj. yaHwIj vIcheghDI', jan qoD vInuDchu'. toH, baS rarwI' law'
vISIHlaw'pu', bobcho' chu' vIjomtaHvIS. bobcho'mey vIjuv. ngo'wI'
lang law' chu'wI' lang puS, 'ej jIyepqu'be'mo' loQ De'wI'Hom vIghor.
jIvum; tugh HochHom rarwI'mey vISIHHa'ta'. bobcho' ngo' vIjomqa'.
vIwaH. loQ Qap, 'ach nom luj. jIvumqa' 'ej Hoch rarwI'mey'e' tlhoS
vISIHHa'. bobcho' ngo' vIjomtaHvIS, vISIHqa'be'meH, jIyepchu'.
Qapla'! Qapqa'taH togh DeghwI'. 'ach DaH bobcho' chu' vIjomvIp.
ghorbeHba' rarwI'. vaj "3Com" vIrI'. Seng vIDelDI', muQaHqang
chamwI'. jIHvaD qa'meH ngeH 'e' lay'. jan chu' vIHevDI' janwIj
ngo' vItatlhnIS.
jav Hu' jan chu' vIHev. 'oHDaq DubmeH bobcho' vIjom. pagh rarwI'
vISIH. Qapchu' De'wI'HomwIj chu'. cha'Hu' be'nalwI' De'wI'HomvaD
DubmeH mIw vIta' chaw' ghaH. DaH De' wItam wIneHDI', ngeDqu' mIw.
SKI: ghunchu'wI' upgrades his PalmPilot to a Palm III-alike, but
encounters trouble along the way.
-- ghunchu'wI' 'utlh