tlhIngan-Hol Archive: Mon May 18 17:26:10 1998
[Date Prev][Date Next][Thread Prev][Thread Next]
Qel yaH vISuch
- From: "William H. Martin" <[email protected]>
- Subject: Qel yaH vISuch
- Date: Mon, 18 May 1998 20:26:05 -0400 (Eastern Daylight Time)
- Priority: NORMAL
DaH Qel vIloS. jIloStaHvIS QonoSvam vIqonmeH De'wI'Hom
(PalmPilot) vIlo'.
'oy'qu' HughwIj. wa'Hu' ngengHomDaq DujHomwIj (kayak) chu'
vIlo'. vIDajtaHvIS jIyoychoH. jIyoyHa'choH 'e' vInID, 'ach
Qu'vam vIta'be'. Do'Ha'. *exit* yIQ vIta'nIS. Do' Qu'vam
vIta'chu'.
Do'Ha' jIyoytaHvIS ghIchwIj teb bIQ lam. puch 'oH ngengvam'e'
'e' Harlaw' Ha'DIbaH law'. Do' DujHomvo' jInargh. Do'Ha'
ghIchwIj HIvta' rop.
DaH De'wI'na'wIjDaq jIchegh. De'wI'wIjHomvo'
De'wI'na'wIjvaD QonoSvam vIQay. jIqontaH 'e' vIpIH 'ach
QongchoH bangwI' neH bangwI' 'ej SIbI' jImejnIS. Do'Ha'. chaq
tugh jIcheghqa'.
cha'Hu' QonoSvam vItagh. DaH vItaHchoH. Hergh HoSghaj
(antibiotics) vIje'nIS jIHvaD 'e' chup Qel. vIje' 'ej jISopchoH.
bIQDaq muHIv *bacteria* 'e' vIHarmo' QaQ Herghvam. qaStaHvIS wej
ram bangwI' juHDaq jIleS. DaHjaj juHwIjDaq jIchegh. pa' rop
latlh *housemate*. vItlhob, <<chay bIrop? jIropchoHDI' 'oy'qu'
HughwIj.>>
muja', <<jIH je. jIroptaHDI' 'oy'qu' nachwIj.>>
vIja', <<jIH je. 'oy'qu'taHDI' nachwIj, tebchoH
*sinus*Du' 'ej HuvHa'choH taghDu'wIj.>>
muja', <<jIH je.>>
vItlhob, <<ghorgh bIropchoH?>>
muja', <<loSHu' jIropchoH.>>
cha'Hu' jIropchoH. chaq muropmoHbe' ngeng *bacteria*. chaq
muropmoH *housemate* *virus* 'ej lI'be' HerghwIj. chaq jIDogh.
burghwIj luHwIj je DIS Herghvam. wa'Hu' ram SIpmo' 'oy'qu'
luHwIj 'ej loQ jIQong neH. DaHjaj jIropmo' yaHwIjDaq jIvumbe'.
charghwI'