tlhIngan-Hol Archive: Tue Jun 09 03:48:32 1998
[Date Prev][Date Next][Thread Prev][Thread Next]
jIQonglaHbe'mo' lutHom vIqon
- From: "Eric Andeen" <[email protected]>
- Subject: jIQonglaHbe'mo' lutHom vIqon
- Date: Tue, 9 Jun 1998 03:46:36 -0700
- Importance: Normal
*** lutHom neH 'oH lutHomvam. teHbe'chu'. ***
wa'Hu' ram tlhuDwI' wov vItam. jenmo' jan vISIchmeH Sor Hap ngaSwI'Daq
jIQam. Qu'wIj vIta'ta'pa' Dej ngaSwI' 'ej jIpum. pe'vIl yav let mup nachwIj
nIH. SIbI' jIvulchoH.
jIvemDI' jIH DungDaq Qam be'nalwI'. SotmoHba' pumpu'ghachwIj. jIHu' 'ej
jIQam 'ach loQ jIngaDHa'. ropyaH wIghoS.
loQ maloSnIS, 'ach tugh paw Qel boQ. HotlhwI'pa'Daq muDev 'ej nachwIj
Hotlhlu'. latlh pa' muDev 'ej jIloSqa'. tugh 'el Qel. mujatlh (mu'Daj
vImughba') <Sot yablIj 'ach qay'qu'be'. letlaw' nachlIj. 'aDDu'
QIHlu'be'law'>. mujatlh <yIleS. yItlhutlh 'ach HIq yItlhutlhQo'. ghaytan
bergh burghlIj 'ej bISop DaneHbe'. qay'be'.> vIghel <wa'leS jIvumlaH'a'?>.
mujang <bIleSnIS 'ach loQ bIvumlaH. bIvumchugh bIpawDI' yIpaS qoj bImejDI'
yI'eq.>. vIghel <DujwIj vIchIjlaH'a'?>. mujang <bIngaDchugh yIchIj.>.
ropyaHvo' mamej jIH be'nalwI' je. juHmajDaq macheghDI' SIbI' QongDaq wIghoS
'ej maQongchoH. jIDoy'qu' 'ej jIQongchu'.
DaHjaj po jIvemDI' jIDoy'taH 'ej jIqej. motlh ghu'vam: reH jIvemDI' jIDoy'
'ej jIqej. puch vIlo'. Ho'wIj vISay'moH. jISay''eghmoH. jIbwIj vISIHHa'.
'oy' nachwIj 'ach 'oy' vISIQ. wovqu'law' Hoch 'ach vIbuSHa'. meghwIj vISuq
'ej yaHwIj qach vIghoS. jIpaS 'ach motlh ghu'. reH jIpaS. jIpawDI' mujatlh
ghogh HablI' SeHwI' 'ach jIqImbe'taH. jIjangbe'. yaHwIj vIghoS 'ej tlhoS
lojmItwIj vISoQmoH. Do'Ha' latlh yaH SumDaq chuS mIqta', 'ej DaHjaj chuS
law' Hoch jaj chuS puS 'e' vItu'. munuQqu'taH. loQ jIqImlaHbe'.
De'wI'wIj vIchu' 'ej loQ jIloS. QummeH pat vIchu' 'ej tlhIngan Hol jabbI'ID
vIlaDchoH. jabbI'ID'e' labbogh charghwI' vIlaD 'ej jIHagh. latlh vIlaDchoH
'ach Hujlaw' mu'mey vaj vIbuSHa'. yaHwIjDaq 'el *jIyjIy* (De'wI' patmaj tob
ghaH. vaQ. val. 'IH.) vIjatlh <nuqneH>. roD yaHwIjDaq 'ellu'DI' <nuqneH>
jIjatlh. mu'vam luyajlaw' HochHom vumwI'. mujang *jIyjIy*, 'ach vIyajlaHbe'.
vIjang <nuqjatlh?> 'ej ghaHvaD jImISlaw'. mujangqa' 'ach jIyajlaHbe'taH.
vIQoychu'meH jIQam 'ej vIchol. vIjatlh <qayajlaHbe'. chuSqu' mIqta'vam QIp.
yIjatlhqa'.>. mISba' ghaH. pay' jItlhoj: tlhIngan Hol vIjatlhtaH. jIDoghba'.
jIQummeH DIvI' Hol vIjatlhnISba'. vaj jInIDchoH . . . 'ach jIQaplaHbe'.
ghaHvaD jImISqu'choHlaw'mo' mujatlhqa' *jIyjIy*. vIyajlaHbe' jay'. ghaHvaD
wa' nItlh vI'ang 'ej De'wI' vIghoS. tlhIngan Hol jabbI'IDmey vIlaDqa'.
tlhIngan Hol vIlaDlaH 'ach DIvI' Hol vIlaDlaHbe'chu' jay'.
Qu'vatlh. ropyaH vIghoSnISqa'ba'. ghay'cha' baQa'. jIngaDlaw' 'ach DujwIj
vIchIjlaHbe'chu'. chaq jIvulchoH 'ej vay' vIHoH. batlhHa' jIHeghbej.
mu'ghomwIj vISuq 'ej QIt *jIyjIy*vaD jIQIjchoH 'e' vInID. ghaHvaD nItlhwIj
vIQeq. mu'ghomDaq mu' <yaj> vISam 'ej ghaHvaD vI'ang. mojaqmey <-laH> <-be'>
je vISam 'ej vI'ang. jIHDaq nItlhwIj vIQeq. yajlaw' *jIyjIy*. mu' <mup>
<nach> <ropyaH> je vI'ang. yajchoHchu'.
-- pIvtaHbogh pagh