tlhIngan-Hol Archive: Sat Oct 25 18:36:44 1997
[Date Prev][Date Next][Thread Prev][Thread Next]
HaqwIj
- From: "William H. Martin" <[email protected]>
- Subject: HaqwIj
- Date: Sat, 25 Oct 1997 21:38:27 -0400 (Eastern Daylight Time)
- Priority: NORMAL
wa'Hu' Sochvatlh wa'maH vagh rep muHaq Qel. tlhuQwIjDaq
qablaw' 'aDwI' 'ej teqnISlu'pu'. DaHjaj qaSpa' vaghvatlh rep
jIQonglaHbe'. jI'oy'qu'. vISIQba', 'ach vItIvbe'.
muHaqtaHvIS jIHvaD qIvonwIj QongmoHchu' tlhuQwIj 'oy'be'moHbogh
Hergh'e'. SIbI' rejmorgh vIDachu'. jIjach <<yIvem! yIvem!>>
vIHotbej 'ach muHotbe'law'. QIt vem qIvonwIj 'ach vemDI' qIvon
QIpqu'lu'pu'bogh Da qIvonwIj. 'oy'qu'. vISIQba' 'ach jIQuchbe'.
Hergh chu' vIlo'. jI'oy'be'meH HoSghaj, 'ach loQ qay'. chImDI'
burghwIj Herghvam vISopchugh vaj jIropqu'choH. Soj vISopnIS je.
qaSDI' wej rep jISopnISqa'. 'ach Herghmo' puch vIlo'laHbe'.
mevlaw'pu' luHwIj. jIbuy'qu'lI'. [Perfect use of {-lI'} suffix,
if I do say so myself.] vISIQba' 'ach mIw vItaHmoHtaH
vIneHbe'bej.
muDoy'moH Hergh. qaStaHvIS wej rep jISop, Qu'Hommey vItagh,
jIDoy'choH, loQ jIQong, jInaj, jIvem, Qu'Hommey vItaHmoH, 'ej
jajHomwIj jItaghqa'. jISop, Qu'Hommey vItagh...
DaH jIDoy'choH. DoS pIm Sam Hoch mInwIj.
pItlh.