tlhIngan-Hol Archive: Mon Nov 17 10:35:57 1997

Back to archive top level

To this year's listing



[Date Prev][Date Next][Thread Prev][Thread Next]

ram 'IH vItIv



jabbI'IDmeywIj DalaDchugh, vengwIjDaq peDpu' 'e' DaSov.
law'pu' 'engmey, 'ach le' wa'Hu' ram muD Dotlh.
pov ngabchoH 'engmey.  choS Huvchu' chal.
chollaw' Hovmey.  SaltaH maS wovqu'.

ramjep jIQongbe'taHvIS Hur vIlegh.  'IHqu'!
pumpu' Hoch pormey.  chImchu' Sormey.  
vIHbe'.  DIr Hutlhbogh Hom lang rur.
bIrqu' muD.  Say'qu'.
yav chISDaq Qorlaw' maSwov QIbmey je.
yavDaq SorHey Hab cha' QIb.

qIjchu' QIbmey jej.
chISchu' yav wovmoHbogh maSwov.
law' chuch qut.
ngaDHa'law' qutHommey:  boch, bochHa', bochqa'.

pay' chal vIlegh.  
yav wov law' chal wov puS, 'ach loQ rurchuqtaH.

qIjchu' logh.
chISchu' maS Hovmey je.
law' Hov.
ngaDHa'law' Hovmey:  boch, bochHa', bochqa'.

qaStaHvIS tup law' QorwaghDaq jIQan 'ej jIbej.
'IH qo'vam.  'oHDaq jIyInmo' jIQuch.

-- ghunchu'wI'



Back to archive top level