tlhIngan-Hol Archive: Thu Mar 27 11:06:26 1997

Back to archive top level

To this year's listing



[Date Prev][Date Next][Thread Prev][Thread Next]

HoghwIj vIDeltaH



["Bahamas"-Daq mapawpu']

qach'a' DojDaq maleng.
wa'maH wa' qach ngaS.
wa'maH chorgh pa' ngaS Hoch qach.
wa' pa' wIDanchoH.

pe'vIl HIq ngevtaH chomHey.
ja'taH <HIvje'vam Daje'chugh, vIteb 'e' DaDIlnISbe'!>
vIqImHa' 'ach taH. <vItebqa' DaneHchugh, bID neH yIDIl!>
wejpuH -- HIvje' motlhvo' tlhutlhmeH 'ut jav DeQ.
HIvje'vam le' je'meH wa'maH cha' DeQ noblISlu'.
vaj tebqa'meH jav DeQ noblISlu' je!
HIvje' le' tIn law' HIvje' motlh tIn puS, vaj chaq jInuSnISbe'.

qach'a' Dechlaw' yo'Hey!
qach'a' HurDaq verghtaH bIQDuj law'.
raQ rurbej.
bIQ watlh, HoS, QumwI' tlhegh je SuqmeH rar bIQDuj.
ru'be'law' verghtaHghach.
'IHqu' bIQDujmey 'ej tIn.  qutlhbe'ba'...
<DojneS mIplIj> vIQub.

bIr ngengHey bIQ, 'ach tujqu' ngengHom tuj.

Sumqu' SuyDaq'a'.
pa'majvo' nagh baHlu'chugh, chaq SuyDaq'a' SIchbe'.
'ach nagh rap baHqa'lu'chugh, SIchbej.
wIghoS 'ej wInuDtaH.  mayItqu'.
Dat wIQoy': <jIblIjDaq DaQHommey vIchenmoH 'e' yIchaw'!>
be'nalwI' jIbDaq vum neHlaw' Hoch jay'.
<chaq wa'leS vIchaw'> jang be'nalwI'.
<wa'leS po ma-"snorkel" 'e' wInab, 'ej bIruchpa' vISay'moH vIneH>.

maghungchoH.  "China" Soj maSop.
maSoptaHvIS chuSqu'mo' QoQ Sum loQ vInuQlu'.
tugh chuSHa'choH 'ej chuSchoH QoQ Hup.
QoQ luchenmoHtaH ghotna'.
retlhDaq "dance"-choH Hoch.
qaStaHvIS rep ma-"dance" jIH be'nalwI' je.
jIDoy'choH 'ej jIQongbe'laHbe'.
chuSqu'choH QoQ 'ej jeDchoH "cigar" tlhIch.
jIratlhqangbe' 'ach tIvqu'taH be'nalwI' 'ej mejqangbe'.
jIleStaHvIS, "dance"-taH ghaH.
pa'majDaq machegh 'ej nom jIQongchu'.

-- ghunchu'wI'



Back to archive top level