tlhIngan-Hol Archive: Wed Jul 09 16:14:31 1997
[Date Prev][Date Next][Thread Prev][Thread Next]
Saj, 'ay' cha'DIch
- From: "Deborah Kay" <[email protected]>
- Subject: Saj, 'ay' cha'DIch
- Date: Wed, 9 Jul 97 23:15:27 UT
leStaHvIS loDHom, juHDaq paw vav. Qa' HoHta' vav 'ej DubDajDaq 'oH qeng.
Ha'DIbaH naQ SoplaHbe' wej. 'oH choqmeH SoS, juHHovDaq QaDmoH. bIrchoHDI'
muD 'ej peD, gheD puS tu'lu'. vaj 'ut Ha'DIbaH choqlu'pu'bogh.
SIbI' targh tu' vav 'ej be'nalDaj yu' Qa' SurghtaHvIS. ghu' QIj be'nalDaj.
<maj> jatlh vav. <targh rIgh QorghmeH puqloDra', vumnISqu'. yIqunQo'.
ngoy'wI' Dachugh, vaj muHemmoH.>
<jIghoHQo', 'ach targh vIpar> jang be'.
vav ghogh QoyDI' loDHom, Hu'.
<vavoy, vavoy, targhwIj Dalegh'a'?> tlhob.
Hagh vav. <HIja'. 'oH HI'ang, 'uQ wIloStaHvIS.>
HurDaq ghoS 'ej targh nuD vav. loDHomDaq toS targh 'ej volchaHDaj ba'.
loDHom qogh chop targh, yeptaHvIS. Hagh loDHom vav je, targh Dub yachtaHvIS
loDHom.
<'oHvaD pong Danob'a'?> tlhob vav.
<DaH vIruch, vavoy. 'oHvaD SIQwI' vIpong.>
<DaH 'uQ vIjab. SIbI' peghoS.> jach be'nal. nom lob loDnalDaj puqloDDaq je.
SoptaHvIS qorDu', SoSDajvaD tlhob loDHom, <targhvaD 'op DaHjaj gheD
chonob'a'?>
<ghobe'. qaja'pu'. targhvaD bIngoy'.> jang SoSDaj.
<vaj jIghungbe'.> 'ej targhvaD bID nay' pol loDHom.
qaStaHvIS jajmey, langchoH loDHom 'ej rorchoH SIQwI'. 'a QuchHa'be' loDHom.
Dat ghaH tlha' targh Soy'. nom qetqu'DI' SIQwI', pum. mev'eghbe'mo', moQ rur
'oH, loDHom qamDu' muptaHvIS. Hagh loDHom 'ej targh woH. tInchoHDI' SIQwI',
jaj naQ SoptaHlaw'. reH ghungtaH loDHom, 'a targhvaD SojDaj nobtaH. pagh ta'
SoSDaj vavDaj je. vavDajvaD jatlh loDHom 'e' wuq.
<vavoy, taj vIpoQ. wa' HInob.>
<bIQupqu'. qatlh taj DaneH?> tlhob vav.
<reH ghungtaH SIQwI' jIH je. Soj vISuqmo' vIneH, gheD vIwam.> jang puq.
<maj. ghu'vam Dayajmo', jIQuch. ghojmeH taj qanob. batlh yIlo'.>
ghu'Daj Dub loDHom. Qa'Hom law' Sam ghaH. QIt bIH jonmeH, ghoj. ghungbe'
loDHom targh je.
rIn 'ay' cha'DIch.
SanDar