tlhIngan-Hol Archive: Thu Feb 27 20:00:34 1997

Back to archive top level

To this year's listing

• Index by Date
• Index by Thread
• Index by Author

lutvam qun "Sun Tzu"

• From: Alan Anderson <[email protected]>
• Subject: lutvam qun "Sun Tzu"
• Date: Thu, 27 Feb 1997 23:00:26 -0500

ben law' ta' mangghommey Sa' moj neH "Sun Tzu".
"Sun Tzu" tobnIS ta' 'e' wuq.
QI' ghom lI' lumojmeH ta' be'pu' qeqmoHchugh "Sun Tzu", Qu' SuqlaH.

vaj yotlhDaq ghom vaghmaH ta'be'.
latlhpu' DevmeH cha' ta'be'pu' qaqqu' lunumlu'.
vItqu'meH 'ej tlhe'chu'meH ghojmoH "Sun Tzu".
QaQlaw'lI' ghu' 'ach <nIHDaq petlhe'> ra'DI' SIbI' HaghchoH be'pu'.

be'pu' ja' "Sun Tzu":
  lobbe'chugh QaS, ra'chu'be' ra'wI' pagh ja'chu'be' DevwI'.
  vaj jIQaghqa'be'bej.
be'pu' ghojqa'moH.
<poSDaq petlhe'> ra'DI' Haghqa' be'pu'.

ja' "Sun Tzu":
  lobbe'chugh QaS, ra'chu'be' ra'wI' pagh ja'chu'be' DevwI'.
  jIra'chu'ta' vaj pIch lughaj DevwI'.
Devbogh cha' be' tImuH ra'.

be'pu'Daj qaqqu' toDmeH mun ta' 'e' nID.
ta'vaD jang "Sun Tzu":
  jIHvaD Qu' Danobta' 'ej ta'meH jo vIghaj.
  wej QI' ghom lI' mojpu' QaSvam.
  vImojmoHmeH Sun vIta'nIS.
vaj cha' be' lumuHlu' rIntaH.

qaSpu'DI' <nIHDaq petlhe'> ra'lu' 'ej SIbI' HeQ QaS.
not lobHa'qa'.
'ej QI' ghom lI'qu' mojbej.

-- ghunchu'wI'

• Prev by Date: RE: KLBC: winners/losers
• Next by Date: Re: chu'wI'
• Prev by thread: Re: ram chal wanI'
• Next by thread: RE: lutvam qun "Sun Tzu"
• Index(es):
  • Date
  • Thread
  • Author

Back to archive top level