tlhIngan-Hol Archive: Wed Aug 27 19:04:51 1997
[Date Prev][Date Next][Thread Prev][Thread Next]
mIntaD lut
- From: "Neal Schermerhorn" <[email protected]>
- Subject: mIntaD lut
- Date: Wed, 27 Aug 1997 22:07:40 -0400
SuvwI' mojpa' puqloD neH ghaH mIntaD'e'. betleH yanlaHbe'. jaghDaj
lujeylaHbe'. wej vaj 'Iw largh. wej batlh yaj. yuQHom Dab 'ej not SuvwI'
qIH. ghojmoHlaHbe' SoSDaj SoSnI'Daj je. not vavDaj qIH, 'ach qIHchugh, pagh
ghoj.
'ach reH Hovmey lulegh 'ej Qub. *bIyaj'egh 'e' vIHon. bIchun 'ach
bIchunqangbe'. jInaQbe'law'. SoSoy SoSnI'oy je vISaH, 'ej muSaH, 'ach
yapHa'.*
qojDaq ghoS 'ej ba'. *jIHvaD Hoch vIneHbogh munob. 'ach vay'vaD vay'
vInobnISbe'. QongDaq tun vIghaj 'ach naghvam vImaS. QaQ juHwIj, 'ach
bIghHa' rur je. chaq qaD vISamnIS - chaq Qob vISamnIS.* 'ej muD
larghtaHvIS, QIt qojDaq QongchoH.
QongtaHvIS, naj. tlhIch qul je legh. Hoj, 'ej naQ woH. pay' Ha'DIbaH'a'
legh. QIt ghoS mIntaD, 'ach Hojqu'taH. vaQbe' Ha'DIbaH 'e' tul. ghoS je
Ha'DIbaH 'ej jatlh 'e' Qoy mIntaD.
*mIntaD! SoSlI' DeSDu'Daq yIHeD yIruch!*
*SoH 'Iv?*
*no'lI' jIH. puqlI' jIH. tIqlIjDaq qul jIH! DaH jIHvo' yISo'!*
QamvIptaH mIntaD 'ach qetlaHbe'. Ha'DIbaH mInDu' legh. Doq 'ej mach 'ej
chol. ghapDu'DajDaq naQ Hot. naQ pep mIntaD 'ej Ha'DIbaH qabDaq jop.
jach Ha'DIbaH. reghchoH Ha'DIbaH mInDu'pu'. DaH Ha'DIbaH qab leghqa'. mon
Ha'DIbaH 'ej HIv. 'ach DaH QamvIpbe'taH mIntaD. Ha'DIbaH DeS way' 'ej pum
Ha'DIbaH. naQ pepqa' mIntaD 'ej Ha'DIbaH DuQ. HeghtaHvIS Ha'DIbaH, jachqu'
mIntaD.
pay' vem. pe'vIl tlhuH. Hu' 'ej qoj bIng legh.
'ej Duj legh.