tlhIngan-Hol Archive: Fri Aug 08 21:08:52 1997
[Date Prev][Date Next][Thread Prev][Thread Next]
batlh Heghrup SuvwI' qan
- From: "Andeen, Eric" <[email protected]>
- Subject: batlh Heghrup SuvwI' qan
- Date: Fri, 08 Aug 1997 17:54 -0700
A (maybe not so) short story I wrote over the last few weeks. It is NOT
KLBC, so SuStel can enjoy it if he wants to. I'll be gone next week, but
I will try to check up on the list. I will not be checking this email
account, but I should be able to check [email protected]
batlh Heghrup SuvwI' qan
jIqanqu'choH.
loQ jIpujchoH 'ej jIrIghchoH 'ej jIDoy'qu'choH.
ben law', puqpu'ma' jIH je nuHubtaHvIS,
Heghpu' be'nalwI'. retlhDajDaq jISuvtaHvIS,
'ach vItoDlaHbe'. batlh Heghbej, 'ej ghaHvaD
bortaSna' vIchavta', 'ach DachtaHmo' reH jI'IQ.
not latlh vISaw.
qaStaHvIS DIS law', Heghpu' Hoch jupwI'.
Heghpu' Hoch puqwI'. Heghpu' je Hoch puqchaj.
batlh Hegh HochHom, 'ej tugh matay'qa'taH.
Hoch vIta' vIneHbogh vIta'ta', 'ej DaH batlh
jIHegh vIneH.
<qaSta'pa' vagh DIS, QongDaqlIjDaq bIHegh.
'oy' DaSIQnISbe'; bIHeghchoHDI', pIQongmoHlaH.
batlh DaHutlhbe'> mujatlh Qelpu'. nepba':
'oy' vISIQlaHbe', batlh vIHutlhbej.
jISuvtaHvIS jIHeghbe', batlhHa' jIHegh.
jISuvtaHvIS jIHeghmeH, jagh chu' vInejnIS.
Heghpu' Hoch jupwI' ngo', 'ej Heghpu' je Hoch
jaghwI' ngo'. Qo'noSDaq muSuvqangbogh nuv'e'
vISamlaHbe' 'e' vISov.
tev quv vIrur 'e' luQublaw' SuvwI' Qup, 'ej
Hoch Qup law' jIH Qup puS. qaStaHvIS ben
law'qu' jIyIntaHmo', ghaHvaD lut'a'meywIj
potlh law' yInna'wIj potlh puS.
naDev pagh vISaH, vaj nIteb jIHegh 'e' vIwIv.
Hovmey jojDaq jIHegh vIneH.
Qo'noSvo' jImej, 'ej qo' mach Hop vIghoS.
qo' pongna' vISovbe', 'ach pong muja'DI' nganpu',
vavwI' pong, 'elmetlh, vIQoy.
chaq meqvammo' qo'vam vIwIv; jISovbe'.
'Itlhbe' qo'vam. SopmeH, wamtaH HochHom ngan.
wIjtaH je, 'ach chaHvaD Ha'DIbaH potlh law'
tI potlh puS. Duj puS jan 'Itlh puS je ghaj
'elmetlhnganpu', 'ach chaHvaD potlhbe' QeD.
qo'vamDaq yIntaH 'ej yonchu'.
'elmetlh luSuchta' tlhIngan puSqu',
vaj tlhIngan tIgh yajbe' 'elmetlhnganpu'.
'ach batlhna' luyaj. chay' 'e' vISov?
jISovbe', 'ach teHbej. mInDu'chajDaq
vIleghchu'. qo'vamDaq jIHeghcugh,
jIyon. batlh jIHegh.
Ha'DIbaH qu' vInej. mawamchuq jIH Ha'DIbaH
je 'e' vIHech. maHoHchuq. ngem HopDaq jIleng.
pagh nuH vIqeng; yItmeH naQ neH vIlo'.
ngemvamDaq yIntaH HaDIbaH mut qu'.
'oHvaD 'ontar lupong 'elmetlhngan.
qaSta'DI' vagh rep, 'ontar vISamta'.
Qamchu'DI', 'oH jen law' cha' tlhIngan
jen puS 'e' vIQub, 'ach yItmeH DeSDu'Daj
'uSDu'Daj je lo'. wej muleghlaH, vaj
jIloS 'ej Ha'DIbaHvam vIpoj. lurghwIjDaq
leghchoH 'ontar, 'ej nujDaj poSmoH.
tIq Ho'Du'Daj, 'ej jejlaw'. jImon:
Dojbej may'vam.
pay' muleghchu' 'ontar, 'ej taghchu' may'maj.
nom jIHDaq qetchoH 'ontar, 'ej vIHIvrupchoH.
yItmeH naQwIj vIpep, 'ej mapaw'DI' 'ontar chor
DuQ naQwIj. DuQchu'be', vaj ghor, 'ej vIchagh.
maSuvtaHvIS, pIj murIQmoH 'ontar pachDu' Ho'Du' je.
yavDaq mupummoH, 'ej naQwIj bID vIwoH. 'ontar
nach botlhDaq vIDuQ. pujchoH, 'ej Hegh.
nom jIreghtaH.
HurghchoH Hoch.
QIt jIvulchoH.
tam Hoch.
jIjot.
jIQuch.
tugh jupwI'pu' retlhDaq jISuvqa'taH.
tugh no'wI' law' vIqIH.
tugh puqwI'pu' vIleghqa'.
tugh vavwI'vaD qo'vam Huj vIDel.
tugh matay'qa'taH jIH be'nalwI' je.
tugh . . .
pagh