tlhIngan-Hol Archive: Tue Apr 08 09:05:16 1997
[Date Prev][Date Next][Thread Prev][Thread Next]
HoghwIj vIDelta'
- From: [email protected] (Alan Anderson)
- Subject: HoghwIj vIDelta'
- Date: Mon, 7 Apr 97 15:09:07 EST
[tagh jaj Qav]
va yabwIjvo' ngabchoHlaw' wanI' vIqawlaHbogh.
mavemba', 'ej tepmaj wItay'qa'moHba'.
'ach chay' Dujyotlh wIghoS? loQ vIlIjpu'.
lupwI'Hommaj ru' vIcheghmoHnISba'.
toH, jIqawchoH.
mepqachvo' matlheDruptaHvIS, jIboHtaH.
QIt vIH be'nalwI' 'ej paSchoH rep.
vImoDmoH 'e' vInID 'ach jIQapbe'.
pe'vIl jIloSnIS neH.
'ach jIloSbej 'ej tugh tlheDrup rIntaH.
mamejDI' Seng wIghom -- HeDaq mavIHlaHbe'taH.
poStaH bIQtIq juSbogh He'e'.
jaH bIQDuj jen 'e' chaw'beH He.
vIHbe'taH Hoch.
maloStaHvIS, paSchoHtaH rep.
He botHa'DI' bIQDuj 'ej SoQqa'DI' He, mavIHlaH.
nom jIchIj. maloStaHvIS He vIHaDta' vaj jIjeQ.
lupwI'Hom vIngIpHa' 'ej Dujyotlh ghoSmeH lupwI'na' wIloSqa'.
loQ rejmorgh vImoj.
tlheDpa' Dujmaj wItIj'a'?
'ach jIjotHa'nISbe'.
yap poH.
pawpa' Duj lojmIt wISIchbej.
jIjotchoH. QaQ ghu'.
wItIjDI', rarchuqbogh cha' quS DInej.
SIbI' DISam -- Duj raQpo' 'ay' 'etna'Daq bIHtaH, 'ej Duj 'o' lubej.
loQ qIvDu'maj Hot latlhpu' qIvDu', 'ach lanbe'mo' quSmey qay'be'.
chungtaHvIS Duj wImerlu' -- 'etmajDaq wIyuvlu', 'ej nubot pagh.
le'be' leng.
Qong be'nalwI'.
jIlaD.
"Indiana"-Daq mapaw.
Duj 'etna'Daq maH vaj tIjHa'wI'pu' wa'DIch maH.
Dujyotlhvo' nulup 'e' lay' be'nalwI' SoS.
tepmaj vISamtaHvIS, SoSDaj nej be'nalwI'.
quq Qapmeymaj.
SoS juH wIghoS.
be'nI'wI' wIrI' 'e' wInID 'ach latlhvaD Qumlaw'taH.
maleS. wIrI' 'e' wInIDqa' 'ach malujqa'.
wa'maH chorgh vatlh rep 'uQ wISoptaHvIS, nurI' be'nI'.
QeHlaw' ghaH. <qatlh wej naDev tlhIHtaH jay'?> bep.
wa'maH jav vatlh rep paw Duj 'e' luSovmo' ghaH be'nalDaj je,
'ej Dujyotlh vengvo' juHmaj vengDaq lengmeH 'ut wa' rep,
wa'maH Soch vatlh rep puqloDma' wItlhapta' 'e' lupIH.
'ach not nabna' wIcherta' maH.
nom 'uQ wIrInmoH 'ej majaH.
tugh puqloD 'aHDaj je wISuq.
juHmajDaq wIchegh.
maghIQ rIntaH.
yIn motlh wISIQchoH.
Sut wISay'moH 'e' 'oH Qu' wa'DIch'e'...
-- ghunchu'wI'