tlhIngan-Hol Archive: Wed Apr 02 11:12:55 1997

Back to archive top level

To this year's listing



[Date Prev][Date Next][Thread Prev][Thread Next]

HoghwIj vIDeltaH



jajmey Qav vIqawchu'be'.
chaq wanI'vam vImISmoH.

"Saturday" po mavemDI' SIbI' muD wInuD.
maj, 'IH DaHjaj.
Huv chal 'ej belmoH SuS.
jot bIQ.
yo'Hey bIQDuj Say'moHlI' HoDHeymeyDaj.
montaH Hoch.
SuyDaqDaq mayItqa' 'ej puqloDma'vaD vay' wIje'nIS 'e' wItlhoj.
ngaSwI' letqu''e' tuQbogh "conch" wIwIv.
juppu'vaD yIvbeH DIje' je.
cha' DaQHom tuQtaH be'nalwI'.
cha' latlh Suq.
DungluQ meghHom wISop.

DujDaq macheghnIS.
tepmaj wIpol 'ej pa'maj ru' wImej.
bIQDuj verghDaq nuqeng lupwI'.
matIj 'ej maHaghchoH.
Dat QongwI'mey DIlegh.
chIch QonqwI'mey vIja'.
loQ Quplaw' ghotmeyvam Doy'qu'.
"Spring Break" lutIvba'ta'.

yaSDaq QongtaH.
tachDaq QongtaH.
ba'Daq QongtaH.
ba''a'Daq QongtaH.
ravDaq QongtaH.
chach DujHom retlhDaq QongtaH.
ghaytan luchpa'Daq QongtaH je 'ach vItobbe'.
rut He lunIStaH QongwI' puS.
qay'be' ghu' -- tlhaQ neH.

qaSpa' pemjep maqughtaH.
"Jack" wIbej ('oHDaq qanlaw'bogh puq Da "Robin Williams").
"rumba" "cha-cha" je DIta'.
'uQ'a' Dun jablu'.
QoQ bey' muchlu' -- 'oHvaD <SochmaHmey yIqaw!> ponglu'.
tlhaQwI'qoq wIbej -- ghaH vIyajbe' 'ach lutIvqu'law' latlh.

Dojbej wa' nuv; chay' vIDel?
ghopDu'Daj botlhDaq wej moQ nechmoH.
moQ loSDIch chel.
latlh chel -- pumbe'bogh vagh moQmey ruQtaH.
moQ roQ 'ej meQbogh naQ woH.
qul Soplaw'.
QaQqu'.

paSqu' rep "Miami"-Daq pawDI' bIQDuj.
maDoy'taH.
tepmaj wISuqqa'.
wIyu'qa'lu' 'ej wInuDqa'lu'.
"USA" wI'elqa' net chaw' 'ej mebqachDaq nuqengbogh lupwI' wISam.
po'be'law' chIjwI'; QIt leng lupwI'.
lengDaj wa'DIch ta'lI' ghaH tugh 'e' wItu'.
'ach mebqach wISIchbej jIH be'nalwI' je.
pa' wIpoQ.
paSmo' chuv pa' puS; loj pa' le'be'.
loQ le' pa' wISuqbogh.
QongDaq tIn ngaS.
pa'Daq Se' vutwI'jan, bIrmoHwI' je lutu'lu'.
paSqu'taH 'ej maDoy'qu'taH vaj nom maQongchoH.

-- ghunchu'wI'



Back to archive top level