tlhIngan-Hol Archive: Tue Apr 01 08:17:54 1997
[Date Prev][Date Next][Thread Prev][Thread Next]
HoghwIj vIDeltaH
- From: [email protected] (Alan Anderson)
- Subject: HoghwIj vIDeltaH
- Date: Tue, 1 Apr 97 10:29:09 EST
[qaStaHvIS jaj naQ "Bahamas"-Daq maHtaH]
po QIt mavem.
wej wovchoHpu' pa'.
tun QongDaq 'ej tuj.
[tun je bangwI' DIr 'ej tuj je...'ach jIja'Qo']
mavemchu'pu'DI' HurDaq malegh.
HurghtaH pa', 'ej tugh meq wItu': HurghtaH je Hur.
loQ mayay' SIStaHmo'.
SISqu'taH. pe'vIl SISqu'taH.
chalDaq moDtaH 'eng Hurgh.
SIHqu'taH Sormey.
SIStaHvIS muD bIQ SaSmoHlaw' SuS'a'.
jevbejtaH.
bIrtaH SuS. bIrtaH muD yIQ.
chay' 'oy'vam wISIQlaH?
toH, qech nIb wI'ogh jIH be'nalwI' je.
ngengHomHey tujDaq maleS 'e' wIwuq.
wa'Hu' bIQ tuj law' DaHjaj bIQ tuj puS 'e' wItu'mo' maQuchqu'.
ngengHomHey tujDaq latlhpu' DIghom.
loQ bep Hoch.
SISqu'mo' yIt neH pagh.
chImlaw' SuyDaq vaj je'laH pagh.
'argh ghu'...DaHjaj HIq ngevlu' net tuch.
qumwI'pu' chu' wuqlI'mo' nganpu', HatlI' tachDaq tlhutlhlu'DI'.
wa'maH chorgh vatlh rep mubqa' HIq.
pe'vIl loStaH ghIQwI' law' jay'!
jItlhaQ 'e' vInID: <yIQ DaHjaj 'ej QaD> jIja'.
tlhaQba' qar'a' 'ach Hagh pagh.
nupchoH SuS 'ej mayItqangchoH.
SuDqach wISuch.
vaghmaH vatlhvI' DeQ neH mawoD mamejpa'.
qaStaHviS tup puS bIQ'a' HeHDaq maQam 'ej yu'egh DIbej.
DaHjaj ralqu' bIQ'a'.
"snorkel"-meH bIQDujHomDaq malengta' 'e' manab, 'ach qItbe'ba'.
pa'majDaq macheghchoHtaHvIS pay' jevqa' 'ej SISqu'qa'.
nurI' jIb SIHwI' 'ej qachHomDaj SumDaq maqet.
loQ SuS nIS qachHom.
ba' be'nalwI' 'ej jIbDajDaq vum ghotvetlh 'e' chaw'.
cha' DaQHom chenmoH ghaH 'ej Hoch DaQHomDaq cha' moQHom lan.
boch moQHommey; mep bIHba' 'ach baS lururchu'.
[tugh QonoSvam vItaHmoHbej]
-- ghunchu'wI'