tlhIngan-Hol Archive: Mon Mar 04 04:03:52 1996
[Date Prev][Date Next][Thread Prev][Thread Next]
*rIyval*: veSlut 1DIch
- From: [email protected]
- Subject: *rIyval*: veSlut 1DIch
- Date: Mon, 4 Mar 1996 07:03:21 -0500
veSlut wa'DIch (*voSbaD*Daq qaS)
nuH qengbogh ghop'e', 'Iw 'ojqangbogh qa''e' je jenmoHDI',
veSmu''a' luchenmoH 'ej Qom muD. *voSbaD* SuvwI'mey tIqDaq qorDu'
parHa'ghach quv SeymoH, Hajbogh muD lutlhuHDI'. Hajbogh QomwI'Daq
QeH luchel, 'ej ralqu' SIp, DuQchuqtaHvIS tlhIngan *voSbaD* je
mInDu'.
qeqwI' raQmeyvo' DebHeHDaq vIHtaH, tugh pay' chIch mevchu'pa'
chaH. Sormoy'bI' tIn luyuvlI', 'ej 'ovchu'meH pu'beH'a' rIH
tlhInganpu'. jum *voSbaD* Dup, 'ej 'oH tu'taHvIS *rIyval*,
yabDajDaq 'uHqu'law' Doghpu'ghach. muj Dup wuqpu'bogh ghaH.
moy'bI''a' lughuS 'ej baH. nIch 'ugh baHHa'law': pe'vIl wutlhDaq
'uy, 'ej jachlaw' puH. QapHa'bogh nuHmo', jagh mangtlhegh wa'DIch
chuqvo' HaghtaH 'e' lutagh tlhInganpu'. cha'logh wutlh jachmoH
moy'bI''a', HaghtaHvIS. tlhaQ mIw lulo'bogh, wutlhDaq nIch
lupaw'moHtaHvIS. reH paw'DI', Supmo' mang Hoch, wutlh bach
moy'bI''a' loQ 'e' luHoSqu'moH je chaH.
Haghbe' *rIyval*; jaS yay'qu' ghaH. Hagh 'e' mev wa' tlhIngan
mang, 'ej mev latlh, latlh je, latlh je, tay'taHvIS mInchaj
bIQ'a' lutu'mo': puHHeHvo' vIHchoH yu'eghmey; bIQ'a' tlhutlhlu'
'e' rur ghu'; chuSbogh paw'wI' Hoch luQoyDI', chuSwI'vam loblaw'
wa' bIQ'a'Ha'DIbaH; tlhIngan mInDu' merqu' 'ej 'oy'moH. pIpyuS
rur Ha'DIbaH luleghtaHbogh, 'a bIDHey qelI'qamDaq jen nach. Hagh
'e' mevDI' tlhIngan SuvwI' Hoch, ngor jaghchaj, 'e' pum *rIyval*,
"taHqeqpu' quvHa'qu': lItammeH Suvbogh Ha'DIbaH QIp boqem
pujwI'na' tlhIHbogh; SuyIQvIp; SuSuvvIp; qorDu' boQanvIp; yuQraj
boSeHbe'mo', lIQan neH; not Supov; not SuvwI' qa' yonmoH
Qapla'na'. manIvbogh maH ghongorQo'; Qu'vatlh, batlhveS
bojeSHa'chu'; puH'ay'Daq lIvuSba' qo', 'ej ghIjbogh veqlargh
boqaDvIp; boq jeSbe' veqlargh; vaj ghaHmo' chejey, 'ach qa'raj
Sev ghaH, qaStaHvIS poH nI', boqaDlaHpa' jay'." mu'qaDDaj SoDqu'
chuSbogh yu'egh, *rIyval* beq lulIgh HurghmoH pIpyuS Huj QIb.
SIbI' jolmeH ra' la', pavDI' ghu''e': tlhIngan porgh chop 'ej
poSmoH pIpyuS Huj. *nomdok*Daq SuvwI'beq lIqpu', 'ej wanI'
nuDchu' la'. yabDaj nuQ qay'wI' law', 'ej veqlargh
'ongtaHghachmo' bechqu'.