tlhIngan-Hol Archive: Sun Jan 07 08:24:24 1996
[Date Prev][Date Next][Thread Prev][Thread Next]
*rIyval* may' wa'DIch
- From: [email protected]
- Subject: *rIyval* may' wa'DIch
- Date: Sun, 7 Jan 1996 11:23:53 -0500
wejmaHben SuvwI' batlhna' Suq *rIyval*. la' ghaH, taghDI'
HoqmeyDaj. 'a qaSpa' wa' neH Hoq, tlhIngan Hubbeq ghuv ghaH. tIq
tuj ghajbogh yonmoHbe'mo' mangbatlh, ngoj *rIyval*. loQ
lotlhqang, 'ej batlhHe ghoSmeH nejnISlaw'. mangghom'a'Daq boH 'ej
mogh, Hena' leghbe'lu'mo' SaHDI' ghom'a'. vaj 'oHvo' Dachqang
ghaH.
reH ghaH HIghlu'law'. boghHa'bogh puq ghaHpu'. vaj luQanlaHbe'
SoS, vav je, 'ej qorDu' lurDech Sovbe'. bong ghaHvaD qaSHa'
muvtay, 'ej not nentay jeSmeH 'eb ghajpu'. tIqDaj tuj 'angbe' je.
ghaH toy'beH Do'Ha'ghach neH. not ghot vay' voqchu', Duj neH
voqtaHmo'; not DujDaj qeqchu'lI', ghaH Devbe'mo' ghojmoq vay'.
ghaH boQ yab tIn, Quch ghegh je neH. Su', Sov law' ghaj, 'a ruv
yajbe'; 'ongbej, 'a vIDqu'. lurDech pabbe'taHvIS, *rIyval*
lutlhej je matlhbogh beq puS'e'.
tugh mangghomvo' paj, 'e' pegh je. peghbe'chugh vaj qIchbej 'ej
bIj yejquv. chIch nom SuyDaq peghDaj qeng, 'ej pe'vIl Suy
tlhobtaH.
r <SuH, je'wI''a' jIH: toDSaHvo' jIje' je. HoSghajqu' Duj 'e'
vIpoQ jay'.>
S <ghuy'cha', bIje'be'chugh vaj bIHegh. waghmo' Duj, DuyInmoH
mIplIj neH.>
r <ghobe', muje' mIp, 'ach muQan batlhna'. bIjatlh 'e' yImev.
ghIchwIj DabochmoHchugh ghIchlIj qanob: qanob vInIHpa' je.
HoSghajnIS Duj, pegh 'ugh lupnISmo'.>
S <De' lI' Sovlu'DI' chaq Do'Ha'. cha'netlh DeQ'e', DaH yIDIl.
matay'taHvIS vIHbogh bIQ rur mu'qaDmey.>
r <'Iw'e' rur, mu'wIj vIjeDmoH 'e' vImaSmo'.>
S <va, teH jay', Qatlh qajatlhmeH Qu'.>
r <nuqDaq DujwIj?>
S <vergh chorghDaq.>
may' wa'DIchvaD Qap *rIyval*, rut loQ HIghtaHvIS. HIghmeH tIghHom
pab ghaH. ghaH SIQmoHmeH, ben ngortaHmo' 'u'ngan, vaj SIghlI'
bortaS nI' 'ej chIch 'u'nganvaD yuDwI' Da. 'a 'u' tojmeH
nIDtaHvIS, batlh wemlaw'. batlh ghajmeH ra' lurDech'e' neH;
tlhIngan lurDechna' yajbe' je *rIyval*.