tlhIngan-Hol Archive: Wed Jan 25 01:07:22 1995
[Date Prev][Date Next][Thread Prev][Thread Next]
tlhIngan qochpu'wI'vaD jabbI'IDHom
- From: [email protected] (Nick Legend Nicholas)
- Subject: tlhIngan qochpu'wI'vaD jabbI'IDHom
- Date: Wed, 25 Jan 1995 20:08:29 +1100 (EST)
Savan, vajpu'; 'ej pIj jIlI'laHbe'mo' 'ej jIlablaHbe'mo', tlhIHvaD jItlhIj.
toH, ghaytan jItlhIj, tlhIjlu' 'e' lulajqangchugh neH tlhIngan! reH naDev
*Sydney*Daq jIghun; qaSpu'DI' DaH tlha'bogh cha' wej ghap jajmey, ghItlh
lIngbogh De'wI'mIwwIj wa'DIch vIrInmoHta'. rInlaHmeH Qu', Seng
vInapqu'nISmoHpu'; napqu'mo' Qu', Dajbe' Qu' Qapla'. 'a mIw DungqoqDaq,
laHmey Sar lanlaH vay', lanlaHmeH Daq neH tu'lu'chugh. De'wI'mIw napqu'
vIrInmoHpa', Daqvetlh tu'lu'be'.
Hu' pIj jIlI'laHbe', 'ej leS pIj jIlI'laHbe' je. vaj tlhIHvaD
jabbI'IDHommeyvam vIngeH:
naDev QonoSvamDaq jIcheghlaw'pu'mo', murI'pu' charghwI'. Do'Ha', naDev
jIcheghchu'pu'be', 'ej *Melbourne*Daq jIcheghpa', wej jIcheghlaHchu'. 'a
QonoS naQ vIlaD, 'ej qech potlh vIjang reH 'e' vInID. wanI'vetlhmo', jatlh
*ghuy'Do*: QonoSvam Dungqoq voghDaq puvlaw' *nIchyon*. qarqu'; 'a Do'Ha':
'ejyo'waw'wIjDaq SISqu'mo', puvchoH DujwIj pIj net chaw'Qo'.
"topic", "focus" qech QIj *Seqram*, SovwIj ja'taHvIS. qar SoQDaj, 'ej wa'
ngeD neH vIlughqangmoH. jatlh Seqram: yab 'etHeyDaq QIch Doch ngo' lan "topic"
pabmIw. vuDvam vIjatlh 'e' vImaS: yab 'etvo' ngo'bogh Doch So' "topic"
pabmIw, reH 'et Danmo' "focus" QIchDoch. HarmoH HolQeD vuDvam tu'lu'bogh:
mu'tlhegh cha' 'ay'mey tu'lu'. "topic" 'ay'Daq, Doch qellu'bogh maqlu'taHvIS
tu'lu'. "comment" 'ay'Daq, Doch maqlu'bogh tu'lu'. pIj qech ngo' 'oH Doch'e'
qellu'bogh, 'ej Doch, wot joq chu' 'oH Doch'e' maqlu'bogh. "topic/comment"
pab ghajqu' "China" Hol.
QIt tlhetlhlI' *Hamlet* lut mughmeH Qu'. lut 'ay' vImughnISbogh vImughta',
qaSpa' jar puS, 'ej lut 'ay''e' mughnISbogh *ghuy'Do* HochHom mughta' ghaH.
DaH qaS lughmoHbogh Qu'. potlhqu' Qu'vetlh'e', chavlI'bogh *Seqram*. pIj
mu'mey wIwIvHa' jIH, *ghuy'Do* je, 'ej pIj mu'tlhegh Qatlh mughmeH, qech valqu'
'ogh *Seqram*. potlhqu', 'a QIt tlhetlh je, 'ej Qu' moDmoHmeH, Qapbejbogh mIw
wItu'laHbe'. 'a tlhetlhbejlI' Qu'; DIch yIghaj Hochra'.
DaH qaSchoH rep cha'maHvatlh. 'ej wa'Hu' jIQongchoHmo' qaSDI' rep cha'vatlh,
DaH jIDoy'qu'; vaj DaH pItlh. Do' tugh tlhIHvaD jIlI'qa'laHjaj. jIlI'qa'pa',
SarI', 'ej Qapla'raj vInaD.
*nIchyon* jIH.
--
@ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @
Nick Nicholas. Melbourne University, Aus. [email protected]
---
"Some of the English might say that the Irish orthography is very Irish.
Personally, I have a lot of respect for a people who can create something so
grotesque."
-- Andrew Rosta <[email protected]>, <[email protected]>