tlhIngan-Hol Archive: Sun Nov 20 20:06:12 1994
[Date Prev][Date Next][Thread Prev][Thread Next]
"Nethack" lot
- From: [email protected] (Nick Legend Nicholas)
- Subject: "Nethack" lot
- Date: Mon, 21 Nov 1994 14:59:22 +1100 (EST)
reH jIHvaD qaStaH 'ej qaSqa'taH lotmey, qar'a'? qaS je, "Nethack" vIQujtaHvIS.
Qujvetlh boSov'a'? "Dungeons & Dragons" Quj rur, 'a Qujlu'meH De'wI' lo'lu',
'ej Quj 'angmeH, pIqaD lo'lu'.
Dajqu' Quj, Sarmo' wanI'meyDaj, 'ej napHa'mo' Qu'meyDaj. vaj vIQujtaHvIS
vItIvqu'. 'ach pIj vIQujbe', poH nI' poQmo'.
cha'ben Quj pov vItagh. wIch vajbe' vIDa, HoSmo' ghotvetlh 'ej yoD QaQ ghajmo'.
tlhetlhtaHvIS Quj, jIDo'taH. yoD ngevwI'DaqDaq yoDmey pov vItu'. HoS ghopyoD
vItu'; tuQDI' vay', ghaH HoS law', Hoch HoS puS. valmoHbogh mIv vItu' je.
Daq choHbogh ngup'e' vItu' je; tuQDI' vay', choHlaw' DaqDaj, 'ej rut ghaH
qIpHa' ghol.
wanI'vam vItu'meH 'eb wa'DIch vIghaj: "gnome" tlhIl bIngna' vItu'. Do'moHbogh
nagh vItu', bIng vItu'pa'. bIngDaq, Do'moHbogh nagh So'lu'; 'ach vISamnISbe',
Do' Do'moHbogh nagh vItu'pu'mo'. tlhIl vengDaq qa''a'wI''e', "Odin"'e', toy'
qa''a' yaH Qorghbogh lalDan'utlh'e'. vaj, Do' jIhvaD boqghotwI' Damo' 'utlh,
yaHDaq qa''a'wI'vaD lommey vImeQlaH. qa''a'vaD lom law' DameQDI', pop nob
qa''a'. wIch vajbe'vaD "Mjollnir" nob "Odin". yay'moHbogh naQ'a' 'oH. 'oH
SuqDI' vay', ngeDqu'choH Quj 'ay'mey 'eq.
"Mjollnir" vISuqDI', munIDlaH paghna'! "Dungeon" 'ay' potlh vIQulchoH. Hegh
SajwIj, 'a lot 'oHbe' wanI'vam'e'. cha'logh muqIp baS SabmoHbogh
Ha'DIbaH'a''e'. wanI'vammo' Sab yoDmeywIj. yoD HoS -6 vIghajpu'; tugh yoD
HoS -1 vIghaj. 'a Do' qa''a'wI' toy'bogh 'utlh latlh'e' vItu'. cha'logh
chIrghDajvaD Huchnob vInob. vaj, munaDmeH, yoDHoSwIj law'moH ghaH, 'ej yoD
HoS -6 vISuqqa'. qa''a'wI'vaD lommey vImeQqa'mo', jIHvaD cha' nuH latlh Dun
nob "Odin": wIchHoS qIlbogh "Magicbane"'e', taDmoHbogh "Frostbrand" je.
DaH yoD HoSmoHbogh ghItlhmey'e' vInejchoH. ghItlhvetlh laDlu'DI' chechtaHvIS
qoj mIStaHvIS, SabHa' Sabbogh yoDDaj. vaj ghItlhmeyvetlh, HIq je vItu'DI',
jIchepqu'choH.
toH, negh qach vI'el. yoq chaHmo' negh, chaH SIQ law', Ha'DIbaH motlh SIQ
puS. 'a cha'logh wejlogh joq neH qIpchugh "Mjollnir", rIntaH je chaH. vaj:
qachDaq chorgh mang tu'lu'. loS vIrInmoHDI', muqIpHa' tIH. "Nethack"
ngeHbejDaq, tIHnuH Sar tu'lu'. tIH SupmoHbogh ("reflection") yoD'e', Degh'e'
joq tuQlu'chugh, vaj tIHvetlh nIDlaH. wej vIghaj. 'a jISotbe', negh Hoch
vIHoHba'mo', muHeghmoHpa' tIH. vaghDIch vIHoHDI', muqIpchu' tIH. qIpbogh
tIHnuH tIH 'oHbe'. QongmoHbogh tIHnuH tIH 'oHbe'. muD ral tIHnuH tIH 'oHbe' je.
qubqu' tIHnuH 'oHbogh, 'a yapbe' qubtaHvIS, bong 'oH ghajmo' mang chorghDIch:
Hegh tIHnuH tIH 'oH, 'ej 'oHmo', SIbI' jIHegh.
SIbI' jIHeghDI', loQ jIbergh --- DIch yIghaj!
rInDI' Quj, Do' Guido jabI'ID vIHev; *Hamlet* lut 'ay' vagh DoD wa' rInmoHta'
ghaH, 'ej vInoHmeH lI'. chaq loQ wanI'vammo' jIberghHa'choH...
ghob Qum'a' lutwIj? Qumchugh, vaj jIHvaD ghobvetlh yISovmoH, wej vISovmo'
jIH...
--
@ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @ @
Nick Nicholas. Melbourne University, Aus. [email protected]
---
"Some of the English might say that the Irish orthography is very Irish.
Personally, I have a lot of respect for a people who can create something so
grotesque."
-- Andrew Rosta <[email protected]>, <[email protected]>